Սիմոնյանը նաև հայտարարեց փոխադարձ այցելություններ կազմակերպելու ծրագրերի մասին
ԵՐԵՎԱՆ, 11 սեպտեմբերի․/Նովոստի–Արմենիա/․ Հայաստանի անվտանգության խորհրդի քարտուղար Ալեն Սիմոնյանը հայտարարել է, որ իր` Բաքու այցի վերաբերյալ այս պահին որևէ պայմանավորվածություն չկա։
Ավելի վաղ Արցախի նախկին պետնախարար Ռուբեն Վարդանյանի կինը՝ Վերոնիկա Զոնաբենդը, պատրաստակամություն էր հայտնել Անվտանգության խորհրդի քարտուղար Ալեն Սիմոնյանի հետ մեկնել Բաքու` այցելելու հայ բանտարկյալներին։ Զոնաբենդը նշել էր, որ ԶԼՄ-ներից է տեղեկացել Սիմոնյանի՝ Բաքու հնարավոր այցի մասին:
«Ցավոք սրտի, կարդացել եմ (Զոնաբենդի նախաձեռնության մասին – խմբ.), բայց նման պայմանավորվածություն, որ ես Բաքու պետք է այցելեմ, չկա։ Ժամկետների հետ կապված որևիցե խոսակցություն չեմ կարող ասել։ Տենց բան չկա», – ասաց Սիմոնյանը ճեպազրույցի ժամանակ։
Սիմոնյանը նաև հայտարարեց փոխադարձ այցելություններ կազմակերպելու ծրագրերի մասին:
«Բայց նախ ո՞վ ասաց, որ Բաքվի մասին է խոսքը: Սա «օդում» խոսակցություն է», – ասաց Սիմոնյանը:
Զոնաբենդի նախաձեռնությունը
Հունիսին Զոնաբենդը հանդես էր եկել հումանիտար նախաձեռնությամբ, որը նախատեսում էր կանանց միջազգային պատվիրակության այցի կազմակերպում Բաքու՝ անազատության մեջ գտնվող հայերին այցելելու համար:
Հուլիսին Վարդանյանի կինը երկու անգամ նամակ է հղել պլանավորվող ուղևորության կապակցությամբ՝ Հայաստանի վարչապետ Նիկոլ Փաշինյանին և Ադրբեջանի օմբուդսմենին: Հուլիսի 30-ին Փաշինյանին ուղղված նամակում նա խնդրել էր նշանակել նախաձեռնության համակարգման պատասխանատու և ապահովել անհրաժեշտ դիվանագիտական ու գործնական աջակցություն այցի նախապատրաստման հարցում:
Սեպտեմբերի սկզբին տեղի է ունեցել Զոնաբենդի հանդիպումը ՀՀ ԱԳՆ ներկայացուցիչների, ինչպես նաև Գերիների, պատանդների և անհայտ կորածների հարցերով միջգերատեսչական հանձնաժողովի անդամների հետ: Իրավապաշտպան Սիրանույշ Սահակյանի հաղորդմամբ՝ հանդիպման ընթացքում քննարկվել է, մասնավորապես, Կարմիր խաչի միջազգային կոմիտեի (ԿԽՄԿ) գործունեության կասեցման պայմաններում երրորդ երկրի միջոցով գերիներին այցելելու հնարավորությունների ստեղծումը, Բաքվում գտնվող ՀՀ քաղաքացիներին հյուպատոսական ծառայությունների մատուցումը և հումանիտար նախաձեռնությունների իրականացումը: Հարցը գտնվում է քննարկման փուլում: