Ասում եմ` անգրագետ եք, մասնագետ բերեք թող խցանումների հարցը լուծի. Զարոկյանը` Ավինյանի զգուշացման մասին․ ՏԵՍԱՆՅՈՒԹ

Երևանի ավագանու «Ազգային առաջընթաց» խմբակցության անդամ Պեդրո Զարոկյանը լրագրողների հետ զրույցում անդրադարձել է ավագանու նիստում քաղաքապետ Տիգրան Ավինյանի հետ տեղի ունեցած միջադեպին, երբ քաղաքապետը նրան անվանել էր «անբարտավան ու անպարկեշտ» և հայտարարել, որ «շատ խիստ կպատժվի, եթե հաջորդ անգամ բերանը բացի»։

Զարոկյանի խոսքով՝ քաղաքապետի զայրույթի պատճառն այն էր, որ ինքը նիստի ընթացքում բարձրաձայնել է քաղաքային իշխանությունների ոչ պրոֆեսիոնալիզմի և կոռուպցիոն ռիսկերի մասին։

«Ես չգիտեմ՝ ինչի՞ց նեղացավ․ որովհետև իրենց անգրագիտության մասին խոսեցի խցանումների հարցով և հարց բարձրացրի կոռուպցիայի մասին։ Երթևեկության կազմակերպման կենտրոն են ստեղծել՝ աշխատավարձի համար ամսական 41 միլիոն դրամ հատկացումով, իսկ տնօրեն են նշանակել Ավինյանի զարմիկի ամուսնուն՝ Էդվարդ Այվազյանին, ով 1,8 միլիոն դրամ աշխատավարձ է ստանում, բայց ոլորտի մասնագետ չէ։ Երեք տարի է՝ ասում ենք՝ դրսից երթևեկության ինժեներ, խցանումների մասնագետ բերեք, բայց բերել են բարեկամին։ Ասում եմ՝ անգրագետ եք, չեք կարողանում անել, մասնագե՛տ բերեք, նեղանում են»,- նշեց Զարոկյանը։

Ավագանու անդամը նաև նշեց, որ Այվազյանը տարիներ առաջ «Ինշին» ՍՊԸ-ի ղեկավարն էր, որին քաղաքապետարանն առանց մրցույթի տրամադրել էր Խանջյան և Սայաթ-Նովա փողոցներում գտնվող մեծ գովազդային վահանակները, որոնք ամսական միլիոնավոր դրամների եկամուտ են ապահովում։

Զարոկյանը ցուցադրեց լուսանկարներ՝ պնդելով, որ պարեկներն իրենք են երթևեկելի հատվածներում կանգնելով կամ վարորդների հետ զրուցելով արհեստական խցանումներ գոյացնում։ Անդրադառնալով երկրորդ շարքում կայանելու խնդրին՝ նա ընդգծեց․ «2024 թվականին արդեն 17,000 տուգանք է կիրառվել երկրորդ գծում կայանելու համար։ Մենք երեք տարի առաջ առաջարկել էինք կարմիր գծերի փոխարեն 5-րոպեանոց կանգառի հատվածներ ստեղծել, որպեսզի առաքիչները, տաքսիները կամ քաղաքացիները մարդ իջեցնելու կամ ապրանք հանձնելու համար չփակեն երկրորդ գիծը»։

Մանրամասները՝ տեսանյութում։