Սյունիքի մարզի Տեղ համայնքի համայնքապետարանը հերքել է «Առավոտի» տարածած տեղեկատվությունը, թե իբր Հակարիի կամրջի մոտ ադրբեջանցները փորձել են առաջ գալ, հայտնում է Արմենպրեսը:
«Առավոտըը» լուրը հրապարակել էր՝ հղում տալով Տեղ համայնքի Կոռնիձոր բնակավայրի վարչական ղեկավար Սուրեն Ամարյանին։
Հերքման տեքստը հրապարակվել է Տեղի համայնքապետարանի Ֆեյսբուքյան էջում։
«Սուրեն Ամարյանի փաստմամբ՝ առավոտյան իրեն մոտեցած անձինք ներկայացել են որպես Կարմիր խաչի միջազգային կոմիտեի աշխատակիցներ, մինչդեռ հետագայում պարզվել է, որ նրանք «Առավոտ» թերթի աշխատակիցներ են։
Պարոն Ամարյանը նաև հստակ նշել է, որ հրապարակման մեջ ներկայացվող դեպքը տեղի է ունեցել չորս տարի առաջ, և ներկայումս որևէ թափանցման փորձ կամ նմանատիպ միջադեպ չի արձանագրվել։
Հայաստանի Հանրապետության ինքնիշխան սահմանների պաշտպանությունն իրականացվում է շուրջօրյա՝ Հայաստանի Հանրապետության զինված ուժերի և սահմանապահ զորքերի կողմից։
Կոչ ենք անում զերծ մնալ ապատեղեկատվության տարածումից և հետևել բացառապես պաշտոնական տեղեկատվական աղբյուրներին»,- ասված է հերքման տեքստում։
Ի պատասխան «Առավոտը» հրապարակել է Սյունիքի մարզ այցելած լրագրողների եւ Տեղ խոշորացված համայնքի ղեկավարի տեղակալ, Կոռնիձորի վարչական ղեկավար Սուրեն Ամարյանի զրույցի ձայնագրությունը։