ԱՄՆ-ի և Իրանի միջև ռազմական հակամարտությունը կտրուկ էսկալացիայի նոր փուլ է մտել։ Թեհրանը հայտարարել է, որ հրթիռային և ԱԹՍ հարվածներ է հասցրել Քուվեյթում (Ահմադ ալ-Ջաբեր ավիաբազա) և Միացյալ Արաբական Էմիրություններում (Ալ-Մինհադ ավիաբազա) գտնվող ամերիկյան ռազմական օբյեկտներին։ Իրանական կողմի պնդմամբ՝ սա պատասխանն էր Իրանի հարավային շրջաններին ԱՄՆ-ի հասցրած ավիահարվածներին, որոնց հետևանքով վերջին շաբաթվա ընթացքում զոհվել է առնվազն 19 մարդ։
Քուվեյթի զինվորականները հաստատել են, որ կալանավորել են հրթիռներն ու անօդաչուները՝ իրանական հարձակումն անվանելով միջազգային իրավունքի կոպիտ խախտում։ ՄԱԷ իշխանություններն իրենց հերթին հայտնել են, որ իրենց տարածքում հարվածներ չեն արձանագրվել։
Իրանական աղբյուրների փոխանցմամբ՝ ամերիկյան հարձակումների թիրախում է հայտնվել նաև հարսանեկան արարողություն, որտեղ զոհվել է 4 մարդ, այդ թվում՝ երեխա։
ԱՄՆ փոխնախագահ Ջեյ Դի Վենսը հայտարարել է, որ Վաշինգտոնը հետաքննություն է սկսել միջադեպի առնչությամբ, սակայն ընդգծել է, որ «ծայրահեղ կասկածամտությամբ» է վերաբերվում իրանական լրատվամիջոցների հաղորդագրություններին։
Զուգահեռաբար, ԱՄՆ զինված ուժերի Կենտրոնական հրամանատարության (CENTCOM) ներկայացուցիչ Թիմ Հոքինսը հայտարարել է. «Ամերիկյան զինվորականները երբեք հարվածներ չեն հասցնում քաղաքացիական անձանց, ի տարբերություն Իսլամական հեղափոխության պահապանների կորպուսի (ԻՀՊԿ)»։
Ռազմական գործողությունների ծավալումը տեղի է ունենում ԱՄՆ նախագահ Դոնալդ Թրամփի հայտարարությունների ֆոնին առ այն, որ ամերիկյան բանակը պատրաստ է Իրանին հարվածել «ցանկացած պահի»։