Նոր ուսումնական տարվա մեկնարկի, ուղևորափոխադրումների և ավտոմոբիլային երթևեկության ինտենսիվության ավելացման պայմաններում «Հարավկովկասյան երկաթուղի» ընկերությունը ՀՀ բնակիչներին հիշեցրել է երկաթուղային ենթակառուցվածքում անվտանգության կանոնները խստորեն պահպանելու անհրաժեշտության մասին։
«Հատուկ ուշադրություն պետք է դարձնել երեխաների անվտանգությանը։ Երկաթուղային գծերը խաղերի, զբոսանքի և ժամանցի վայր չեն։ Գծերը թույլատրվում է հատել միայն դրա համար նախատեսված և համապատասխան կերպով կահավորված վայրերում՝ պահպանելով անվտանգության բոլոր պահանջները»,-ասվում է հաղորդագրության մեջ:
Այն ծնողներին, որոնց երեխաները հաճախում են երկաթուղային գծերի հարևանությամբ գտնվող դպրոցներ, խորհուրդ է տրվում պարբերաբար զրուցել երեխաների հետ և հիշեցնել երկաթուղային գծերում, երկաթուղային կամուրջների վրա, շարժակազմի մոտ և երկաթուղային ենթակառուցվածքի այլ օբյեկտներում գտնվելու վտանգների մասին։
ՀԿԵ-ի նախաձեռնությամբ դպրոցական ծրագրում ներառվել է երկաթուղում անվտանգ վարքագծի վերաբերյալ դասընթաց։ Սակայն երեխաների ստացած գիտելիքները պահանջում են մշտական ամրապնդում, ուստի դպրոցականների շրջանում պատասխանատու վարքագծի ձևավորման գործում կարևոր դեր ունեն նաև ծնողները։
ՀԿԵ-ն նաև դիմել է ավտոտրանսպորտային միջոցների վարորդներին՝ կոչ անելով խստորեն պահպանել երկաթուղային գծանցներով երթևեկելու կանոնները։ Անհրաժեշտ է գծերը հատել միայն դրա համար նախատեսված վայրերում, ուշադիր հետևել ճանապարհային նշաններին և լուսացույցների ազդանշաններին, ինչպես նաև կատարել կարգավորողների պահանջները։
«Երկաթուղում անվտանգությունը կախված է յուրաքանչյուրից։ Պարզ կանոնների պահպանումը օգնում է պահպանել կյանքն ու առողջությունը՝ հատկապես երեխաների»,-նշված է «Հարավկովկասյան երկաթուղի» ընկերության հաղորդագրության մեջ։