Արհեստական բանականության համակարգեր մշակող չինական Deepseek ընկերությունը կապիտալի ներգրավման նոր փուլի նախապատրաստման շրջանակում ստացել է 74 մլրդ դոլար նախնական գնահատում։ Այս մասին հայտնում է Wall Street Journal-ը։
«Deepseek-ը շուտով նախատեսում է նոր ֆինանսավորում ներգրավել, որի արդյունքում արհեստական բանականության ոլորտում գործող այս չինական ստարտափի գնահատումը կկազմի 74 մլրդ դոլար»,— նշվում է հրապարակման մեջ։
Իրազեկ աղբյուրները պարբերականին հայտնել են, որ ընկերությունը մտադիր է ներգրավել 7.4 մլրդ դոլար։ Այդ միջոցները նախատեսվում է ուղղել գիտահետազոտական և փորձարարական-կոնստրուկտորական աշխատանքներին, ինչպես նաև հաշվարկային ենթակառուցվածքի ընդլայնմանը։
Ավելի վաղ՝ հունիսին, թերթը հայտնել էր, որ 7.4 մլրդ դոլար ներդրում ներգրավելուց և ավելի քան 50 մլրդ դոլար գնահատում ստանալուց հետո ընկերությունը դարձել է Չինաստանի ամենաթանկ ԱԲ ստարտափը։
Deepseek-ը չինական ընկերություն է, որը մասնագիտացած է արհեստական բանականության ոլորտի մշակումների և համանուն նեյրոցանցի զարգացման մեջ։ Ընկերությունը լայն ճանաչում է ստացել անցած տարի AI օգնականի թողարկումից հետո, որը, ըստ ընկերության կայքի, իր հնարավորություններով չի զիջում ChatGPT-ին։