Իրանն ու Օմանը մոտ են Հորմուզի նեղուցով անվտանգ տարանցումն ապահովելու վերաբերյալ համաձայնագրի կնքմանը, ինչի ֆոնին Brent տեսակի նավթի գինը նվազել է մեկ բարելի դիմաց 90 դոլարից ցածր, հաղորդում է CNBC-ն։
Օրերս երկու երկրների ներկայացուցիչները քննարկել են ժամանակավոր նավագնացության միջանցքի ստեղծումը և նեղուցի ջրային տարածքի համատեղ ականազերծումը։ Միևնույն ժամանակ նավագնացությունը շարունակում է սահմանափակ մնալ․ նախորդ օրը նեղուցով անցել է ընդամենը հինգ առևտրային նավ՝ վերջին տասը օրվա միջին 15-ի դիմաց։
Նավթի գների վրա լրացուցիչ ճնշում է գործադրում նաև ամերիկացի դիվանագետների վերադարձը Պարսից ծոցի երկրներ, ինչը նվազեցնում է ռազմական էսկալացիայի ռիսկը։ ԱՄՆ-ը դեռևս ձեռնպահ է մնում իրանական նավթի արտահանումը սպասարկող չինական ֆինանսական ընկերությունների նկատմամբ լայնածավալ երկրորդային պատժամիջոցներ կիրառելուց։
Օրերս Brent-ի ֆյուչերսները նվազել են 3.4%-ով՝ մինչև 89.05 դոլար մեկ բարելի դիմաց, իսկ WTI-ն՝ 3.6%-ով՝ մինչև 81.99 դոլար։ Ավելի վաղ ԱՄՆ-ի և Իրանի միջև Հորմուզի նեղուցի վերաբերյալ հնարավոր համաձայնագրի ակնկալիքները նպաստել էին նաև ֆոնդային շուկաների աճին։
ԱՄՆ ֆինանսների նախարար Սքոթ Բեսենթը հայտարարել էր, որ նեղուցի բացումը կարող է տեղի ունենալ առաջիկա օրերին, իսկ Dow Jones ինդեքսը Դոնալդ Թրամփի՝ բանակցություններում առաջընթացի մասին հայտարարությունների ֆոնին հասել էր ռեկորդային փակման մակարդակի։