Չինաստանում շքեղության ապրանքների ոլորտը լուրջ ճգնաժամ է ապրում․ առաջատար նորաձևության տների վաճառքները կտրուկ անկում են գրանցել։ Ինչպես հայտնում է Bloomberg-ը, հարկային օրենսդրության խստացումը և կապիտալի նկատմամբ վերահսկողությունը զգալի հարված են հասցրել Չինաստանի ամենահարուստ գնորդների ֆինանսական հնարավորություններին։
Նոր տվյալները ցույց են տալիս, որ հուլիսին աշխարհի 25 խոշորագույն շքեղության ապրանքանիշերի շրջանառությունը նվազել է ավելի քան 10%-ով։ Այս ցուցանիշն ավելի վատ է, քան հունիսին գրանցված արդյունքը, և կտրուկ հակասում է տարեսկզբին շուկայում տիրող ակտիվությանը։ Ոլորտի աղբյուրները հայտնում են, որ Louis Vuitton-ը, Dior-ը, Gucci-ն, Bottega Veneta-ն և Balenciaga-ն վաճառքների երկնիշ անկում են գրանցել։ Նույնիսկ Hermes-ը, որը նախկինում կայուն աճ էր ցուցադրում, այժմ հայտնվել է բացասական ցուցանիշների գոտում։ Chanel-ի և Prada-ի աճի տեմպերը նույնպես զգալիորեն դանդաղել են։
Համաշխարհային կորպորացիաների համար նման իրավիճակը լրացուցիչ անորոշություն է ստեղծում առանցքային վաճառքի շուկաներից մեկի հեռանկարների շուրջ։ Երկար տարիներ Չինաստանը եղել է շքեղության ապրանքների արդյունաբերության գլխավոր շարժիչ ուժը, սակայն այժմ ամենահարուստ հաճախորդների համար մրցակցությունն ավելի է սրվել։ Պատճառը պարզ է․ երկրի տնտեսական անկայունության ֆոնին միջին խավը կրճատել է իր ծախսերը։
Անկումը համընկել է Պեկինի կողմից կապիտալի արտահոսքի դեմ պայքարի և պետական բյուջեի համալրման լայնածավալ արշավի հետ։ Իշխանությունները խստացրել են անդրսահմանային բաժնետոմսերի առևտրի կանոնները և քաղաքացիներից պահանջել միլիարդավոր դոլարների հարկեր վճարել օֆշորային հաշիվներից ստացված և ներդրումային եկամուտների համար։
Այս քայլերը զգալիորեն զսպել են չինացի ապահովված քաղաքացիների սպառողական ակտիվությունը և վտանգի տակ են դրել շուկայի վերականգնումը, որը սկսվել էր մեկ տարուց էլ պակաս ժամանակ առաջ՝ ֆոնդային բորսաներում արհեստական բանականության շուրջ առաջացած մեծ հետաքրքրության շնորհիվ։
Ապրանքանիշերի կողմից տրամադրված տվյալները վկայում են, որ Չինաստանում սպառողների տրամադրությունները շարունակում են վատթարանալ։