Թուրքիայի արդարադատության նախարարությունը խնդրել է Իսրայելի վարչապետ Բենիամին Նեթանյահուին միջազգային հետախուզման մեջ ընդգրկել Ինտերպոլի կարմիր ծանուցագրի միջոցով, հայտնել է նախարար Աքին Գյուրլեքը։
Ավելի վաղ հաղորդվել էր, որ «Սումուդ» մարդասիրական նավատորմի գործը քննող Ստամբուլի 11-րդ ծանր գործերով դատարանը հուլիսին ձերբակալման օրդեր է տվել Նեթանյահուին և մյուս մեղադրյալներին՝ մարդկության դեմ հանցագործությունների, ցեղասպանության, բանտարկության, դաժան վերաբերմունքի, դիտավորյալ մարմնական վնասվածք հասցնելու, կողոպուտի և տրանսպորտային միջոցի առգրավման մեղադրանքներով։
«2026 թվականի հուլիսի 14-ին Նեթանյահուի <...> դեմ ցեղասպանության մեղադրանքով տրված ձերբակալման օրդերների համաձայն՝ Արդարադատության նախարարությունը դիմել է Ներքին գործերի նախարարությանը՝ միջազգային ձերբակալման կարմիր ծանուցագրեր տրամադրելու խնդրանքով, և համապատասխան փաստաթղթերը նույնպես ուղարկվել են Արտաքին գործերի նախարարություն», – գրել է արդարադատության նախարարը X-ում։
«Մենք կտրականապես մերժում ենք այն պնդումը, որ Նեթանյահուի վարչակազմը, որը Գազայում ցեղասպանության քաղաքականություն է վարում, անձեռնմխելի է քրեական հետապնդումից։ Մենք թույլ չենք տա, որ Գազայում կատարված հանցագործությունները թաքցվեն, ինչպես նաև թույլ չենք տա, որ մեղավորները պաշտպանվեն անպատժելիության վահանով։ Մենք վճռականորեն կօգտագործենք բոլոր հասանելի իրավական միջոցները՝ համաձայն ազգային և միջազգային օրենսդրության», – հայտարարել է թուրք նախարարը։