Էթել Քեթերհեմը՝ ներկայում աշխարհում ապրող ամենատարեց մարդը, նշում է իր 117-ամյակը։ Վերջին մեկ տարվա ընթացքում նա հասցրել է վերապրել մի շարք անսովոր իրադարձություններ՝ լամայի հետ հանդիպումից մինչև Մեծ Բրիտանիայի թագավորի հետ ծանոթությունը։
Էթել Քեթերհեմը, որը բնակվում է Սուրեյի կոմսության Լայթուոթեր քաղաքի Hallmark Lakeview Care Home ծերանոցում, իր ծննդյան օրն անցկացնում է հարազատների և ընկերների շրջապատում, գրել է Telegraph-ը։
«Շնորհակալություն ծննդյան օրվա կապակցությամբ բոլոր բարի շնորհավորանքների համար։ Նույնիսկ 117 տարեկանում այս տարի ինձ հետ շատ բաներ առաջին անգամ տեղի ունեցան՝ սկսած նրանից, որ ես շոյեցի լամայի, մինչև այն, որ բռնեցի թագավորի ձեռքը», — ասել է Քեթերհեմը։
«Ես հրաշալի անցկացրի այս օրը ընտանիքիս և ընկերներիս հետ և անհամբեր սպասում եմ, թե ինչ կբերի հաջորդ տարին»։
Քեթերհեմը ներկայում աշխարհում ապրող ամենատարեց մարդը դարձավ 2025 թվականի ապրիլին՝ 116-ամյա բրազիլացի միանձնուհի Ինա Կանաբարու Լուկասի մահից հետո։
Անցյալ տարվա սեպտեմբերին՝ իր 116-ամյակից կարճ ժամանակ անց, Քեթերհեմին այցելեց Մեծ Բրիտանիայի թագավոր Չառլզ III-ը։ Ներկայանալիս միապետը բռնեց նրա ձեռքը։
Հանդիպման ընթացքում Քեթերհեմը հիշել է 1969 թվականին Չառլզի՝ Ուելսի արքայազն օծվելու արարողությունը, երբ նա 21 տարեկան էր։
«Բոլոր աղջիկները սիրահարված էին ձեզ և ուզում էին ձեզ հետ ամուսնանալ», — ասել է նա թագավորին։
Էթել Քեթերհեմը ծնվել է 1909 թվականի օգոստոսի 21-ին Հեմփշիրի կոմսության Շիպթոն-Բելինջեր գյուղում, Առաջին համաշխարհային պատերազմի սկսվելուց հինգ տարի առաջ։ Նա ութ երեխաներից բաղկացած ընտանիքի նախավերջին՝ յոթերորդ երեխան էր։
Քեթերհեմը համարվում է Էդուարդ VII թագավորի վերջին ողջ մնացած հպատակը, որը մահացել է 1910 թվականի մայիսին։
1927 թվականին, 18 տարեկանում, նա մեկնել է Հնդկաստան, որտեղ մինչև 21 տարեկանն աշխատել է որպես դաստիարակչուհի բրիտանացի զինծառայողի ընտանիքում։
1931 թվականին պաշտոնական ընթրիքի ժամանակ Էթելը ծանոթացել է իր ապագա ամուսնու՝ բրիտանական բանակի փոխգնդապետ Նորմանի հետ։
Սկզբում ամուսիններն ապրել են Սոլսբերիում, ապա Նորմանին գործուղել են ծառայության Ջիբրալթար և Հոնկոնգ։ Հոնկոնգում Էթելը բացել է մանկապարտեզ։ Զույգն ունեցել է երկու դուստր, սակայն երկուսն էլ մահացել են մորից առաջ։ Էթելի ամուսինը մահացել է 1976 թվականին։
Երկարակեցությունը բնորոշ է եղել նաև նրա ընտանիքին. Էթելի քույրերից մեկը՝ Գլեդիսը, ապրել է 104 տարի։
Քեթերհեմը ինքնուրույն մեքենա է վարել մինչև 97 տարեկանը, իսկ 100-ն անց էլ շարունակել է խաղալ պայմանագրային բրիջ։
2020 թվականին, երբ նա 110 տարեկան էր, նա հաղթահարել է COVID-19-ը։
Չնայած տարիքին՝ Քեթերհեմը շարունակում է մնալ մոլորակի ամենատարեց կենդանի մարդը։
Միևնույն ժամանակ, երկարակեցության բացարձակ ռեկորդը պատկանում է ֆրանսուհի Ժաննա Կալմանին, որը, ըստ Գինեսի ռեկորդների գրքի, ապրել է 122 տարի 164 օր։