Վերլուծաբաններն արձանագրել են Պարսից ծոցից նավթի արտահանման համար օգտագործվող տանկերների արժեքի ռեկորդային աճ։ Սուպերտանկերների տարեկան ֆրախտային դրույքաչափերը հասել են պատմական առավելագույնների, իսկ նավթ արտահանող երկրները ձգտում են ձևավորել սեփական նավատորմերը։
Պարսից ծոցից նավթի արտահանման համար օգտագործվող տանկերների գները հասել են ռեկորդային մակարդակի՝ նման փոխադրումների պահանջարկի կտրուկ աճի ֆոնին։ Financial Times-ի վկայակոչած նավային բրոքեր Braemar-ի տվյալները ցույց են տալիս, որ Մերձավոր Արևելքի երկրները շարունակում են ածխաջրածինների փոխադրման այլընտրանքային ուղիներ փնտրել՝ Հորմուզի նեղուցով նավագնացության շարունակվող խափանումների պայմաններում։
Braemar-ի հաշվարկներով՝ երկրորդ եռամսյակի արդյունքներով ինչպես նոր, այնպես էլ շահագործված նավթատար տանկերների միջին գինը գերազանցել է 130 մլն-ը։ Սա ամենաբարձր ցուցանիշն է 2008 թվականից ի վեր։ Բացի այդ, սուպերտանկերների տարեկան ֆրախտային դրույքաչափերը հասել են դիտարկումների ամբողջ պատմության ընթացքում գրանցված ռեկորդային մակարդակների։
Վերլուծաբանները գների և պահանջարկի աճը կապում են արտահանող երկրների՝ սեփական նավատորմ ունենալու ձգտման հետ։ Հորմուզի նեղուցի շրջանում անվտանգության սպառնալիքների պատճառով երրորդ կողմի փոխադրողներն ու գնորդները պահանջում են կամ ավելի մեծ զեղչեր նավթի համար, կամ փոխադրման ավելի բարձր վճարներ, ինչը արտահանողների համար ոչ շահավետ պայմաններ է ստեղծում։
Աբու Դաբիի ազգային նավթային ընկերությունը (Adnoc) և Kuwait Petroleum Corporation-ը արդեն կազմակերպել են շաթլային փոխադրումների համակարգ․ նավթը Պարսից ծոցից նեղուցով հասցվում է մյուս կողմում սպասող տանկերներին, որոնք այնուհետև բեռը տեղափոխում են վերջնական գնորդներին։
Օգոստոսին Adnoc-ը ձեռք է բերել վեց նավթային սուպերտանկեր և հինգ խոշորագույն գազատար նավ։ Գործարքի արժեքը կազմել է $1,3 մլրդ։ Սեփական նավերի օգտագործումը Adnoc-ին հնարավորություն է տալիս ապահովել նավթի անխափան մատակարարումները՝ չնայած Իրանի կողմից շարունակվող հարձակումներին։