Այս ամենը շատ է հիշեցնում էժան ֆարս

Դե ինչ, մինչ Հայաստանում շարունակվում են փոխնախագահ Ջեյ Դի Վենսի այցի շուրջ «թավշյա» թմբուկախաղերն ու անձնուրաց հիացմունքի ծեսերը, տեղեկատվական «մակերես» է դուրս գալիս այդ այցի իրական պատկերը։

Եվ, ցավոք, այն այնքան էլ «գույնզգույն» չէ, որքան մեզ են ներկայացնում։ 
Դատեք ինքներդ.
«TRIPP» անունը կրող ճանապարհի /միջանցքի/ լոգիստիկ հանգույցի մասով մինչ օրս անհասկանալի է մնում՝ արդյո՞ք Հայաստանը ինքն է վերահսկելու իր տարածք մուտքն ու ելքը թշնամական պետությունների (Թուրքիա և Ադրբեջան) քաղաքացիների և բեռների համար։
Իրանի հետ կապված իրավիճակը, ավելի ճիշտ՝ այն հարցը, թե արդյոք «TRIPP»-ը սպառնալիք կլինի Իրանի համար, նույնպես մնաց կադրից դուրս։

Նախագծի «խաղաղ օրակարգի» մասին հերթապահ խոսքերից բացի, որևէ կոնկրետ հայտարարություն, որը կոչված կլիներ հանգստացնել իրանցիներին, մենք չլսեցինք։

Այսինքն՝ մենք կունենանք խնդիրներ Իրանի հետ։ Բացի այդ, նույն «TRIPP»-ը խանդավառությամբ է ընդունվում Ադրբեջանում․ հենց այն Ադրբեջանում, որը ոչ մի յոտայով չի նահանջել Սյունիքով անցնող ճանապարհի դեսուվերենիզացիայի իր պահանջից։

Այսպիսով, ունենք մի իրավիճակ, երբ ամբողջը շատ է հիշեցնում էժան ֆարս՝ թուրք-ադրբեջանական տանդեմին միջանցք տրամադրելու մասին, պարզապես փաթեթավորված ամերիկյան վառ ու գեղեցիկ փաթեթավորմամբ։ Սա այնքան ճչացող իրողություն է, որ միայն մտավոր ունակություններից զուրկ մարդը կարող է տեսնել հակառակը։ 

Այս ամենի մեջ նաև շատ զզվելի էր նայել, թե ինչպես «նոր փրկչի» որոնումների մեջ տապակված հայկական հասարակության մի փոքրիկ մասն ինքն իրեն նետեց «սպիտակ մարդու» առջև խոնարհման բարդույթների մեջ։

Շարունակելի…

Արման Աբովյան