Շաքարային գազավորված ըմպելիքների հաճախակի օգտագործումը կարող է մեծացնել քաղցկեղի զարգացման ռիսկը, NEWS.ru-ին ասել է թերապեւտ Իրինա Վոլգինան։
Վոլգինայի խոսքով՝ նման ըմպելիքների նկատմամբ սերը կարող է նաև հանգեցնել գաստրիտի և խոցերի։
Գազավորված ըմպելիքները դարձել են մեր կյանքի անբաժանելի մասը, և շատերը չեն կարող պատկերացնել իրենց կյանքը առանց դրանց։ Շաքարային գազավորված ըմպելիքները ամենամեծ վտանգն են ներկայացնում։ Դրանք պարունակում են մեծ քանակությամբ արհեստական գունանյութեր և համային ուժեղացուցիչներ, որոնք կարող են առաջացնել ալերգիկ ռեակցիաներ և թունավոր ազդեցություն լյարդի վրա։ «Բացի այդ, դրանք ազդում են կերակրափողի և ստամոքսի վրա՝ առաջացնելով այնպիսի հիվանդություններ, ինչպիսիք են գաստրոէզոֆագեալ ռեֆլյուքս հիվանդությունը, քրոնիկ գաստրիտը և պեպտիկ խոցը, որոնք, իրենց հերթին, կարող են հանգեցնել լուրջ հետևանքների, այդ թվում՝ քաղցկեղի», – զգուշացրել է Վոլգինան։
Նա ընդգծել է, որ շաքարային ըմպելիքների կանոնավոր օգտագործումը կարող է խաթարել լիպիդների և ածխաջրերի նյութափոխանակությունը: Բժշկի խոսքով՝ սա հանգեցնում է ենթաստամոքսային գեղձի, լյարդի և սրտի հիվանդությունների, ինչպես նաև ճարպակալման և շաքարախտի: Մասնագետն ասել է, որ մարդը կարող է ավելի շատ շաքար օգտագործել հեղուկ վիճակում, քան որևէ այլ սննդի մեջ։
Լավագույն լուծումը գազավորված ըմպելիքներից, հատկապես քաղցր ըմպելիքներից խուսափելն է: Կարելի է դրանք փոխարինել սովորական ջրով կամ թեյով: «Բացի այդ, օրինակ՝ գազավորված հանքային ջուր խմելիս խորհուրդ է տրվում նախապես բացել շիշը: Սա այն ավելի անվտանգ է դարձնում օգտագործման համար», – եզրափակել է Վոլգինան: