Երթևեկության կանոնների խախտումների համար սահմանված տույժերի բողոքարկման ընթացակարգն էականորեն փոխող օրենսդրական փոփոխություններ են նախատեսվում՝ եթե վարորդներն այժմ կարող են պարզապես բողոքարկել որոշումը և դրանով իսկ կասեցնել տույժի կիրառումը, օրինակ՝ շարունակելով վարել մեքենան, ապա նոր կարգով բողոքարկումն այլևս չի հետաձգի պատասխանատվությունը։ Նախագիծը շրջանառության մեջ է դրել արդարադատության նախարարությունը։
Գործող կարգավորմամբ, երբ քաղաքացին բողոքարկում է իր նկատմամբ ընդունված վարչական որոշումը, դրա գործողությունը կամ կատարումը ժամանակավորապես կասեցվում է։ Նոր փոփոխությունների նախագծով, սակայն, առաջարկվել է այդ սկզբունքից մի շարք հատուկ բացառություններ սահմանել, հայտնում է Factor.am-ը:
Նախարարությունն առաջարկել է, որ վարչական որոշման բողոքարկումն այլևս չկասեցնի վարորդական իրավունքի կասեցումը, վարորդական իրավունքից զրկումը և տուգանային միավորների կիրառումը։
Այսպիսով, եթե վարորդի նկատմամբ ընդունված որոշմամբ միաժամանակ նախատեսված լինեն դրամական տուգանք և տուգանային միավորների նվազեցում, ապա որոշումը բողոքարկելու դեպքում ժամանակավորապես կկասեցվի միայն գումարի վճարումը։ Տուգանային միավորների կիրառումը չի կասեցվի և շարունակելու է մնալ ուժի մեջ։
Նախագիծը ներկայացվել է հանրային քննարկման և բաց է մնալու մինչև օգոստոսի 25-ը։