Հովիկ Աբրահամյանի որդուն մեղադրում են սպանություն պատվիրելու մեջ․ Նա ձերբակալվել է

Ձերբակալվել է ՀՀ ԱԺ նախկին նախագահ Հովիկ Աբրահամյանի որդին`Արտաշատ համայնքի նախկին ղեկավար, ԱԺ նախկին պատգամավոր Արգամ Աբրահամյանը: Նա մեղադրվում է սպանություն պատվիրելու մեջ, հայտնում է Քննչական կոմիտեն:

Նրա նկատմամբ հանրային քրեական հետապնդում է հարուցվել: Նրան կասկածում են 2023 թվականին Մյասնիկյան պողոտայում Ս․Վ․-ի ( Սողոմոն Վլասյանի) սպանությունը պատվիրելու մեջ:

Ըստ ՔԿ-ի, որ ծրագրված, համակողմանի ապացուցողական և վարութային գործողությունների արդյունքում պարզվել է՝ Ա.Ա.-ն իր կնոջը՝ Է.Ծ.-ին, կասկածել է «Ավետարանի հավատքի քրիստոնյաներ» կրոնական կազմակերպության անդամ, հոգևոր հովիվ Ս․Վ․-ի հետ անձնական փոխհարաբերություններ ունենալու, ինչպես նաև նրան խոշոր գումարներ փոխանցելու մեջ։ Ըստ քննության՝ վրեժխնդիր լինելու շարժառիթով Ա.Ա.-ն նպատակադրվել է կյանքից զրկել Ս․Վ․-ին, սակայն որոշել է հանցավոր մտադրությունն անձամբ չիրագործել և դա կատարել իրենից ֆինանսական ու անձնական կախվածության մեջ գտնվող հավատարիմ անձի՝ անվտանգության աշխատակից Գ.Հ.-ի միջոցով։

Այնուհետև Ա․Ա․-ն, օգտագործելով Գ.Հ.-ի նկատմամբ իր ունեցած ազդեցությունը, ինչպես նաև վերջինիս հավատարմությունն ու պատրաստակամությունը, հանձնարարություն տալու միջոցով նրան դրդել է կյանքից զրկել Ս․Վ․-ին։

Քննության տվյալներով՝ Ա.Ա.-ի հանձնարարությունն ընդունելով որպես պատվեր՝ Գ.Հ.-ն 2023 թվականի ապրիլի 30-ին Երևանի Մյասնիկյան 2 հասցեում գտնվող բնակելի շենքի դիմաց հրազենի կիրառմամբ սպանել է Ս․Վ․-ին։

Քրեական վարույթի նախաքննության ընթացքում քննիչի ներկայացրած միջնորդության հիման վրա հսկող դատախազի որոշմամբ Ա.Ա.-ի նկատմամբ հանրային քրեական հետապնդում է հարուցվել Քրեական օրենսգրքի 46-155-րդ հոդվածի 2-րդ մասի 11-րդ կետով՝ պատվերով սպանություն կատարելուն դրդելու համար։

2026 թվականի օգոստոսի 8-ին քննիչի որոշման հիման վրա ՀՀ ԱԱԾ աշխատակիցները ձերբակալել են Ա․Ա․-ին՝ նրա նկատմամբ կալանքը որպես խափանման միջոց կիրառելու նպատակով դատարան ներկայացնելու հիմքով։