Քաղաքականություն
06.08.2026 | 17:23
Վարչապետ Նիկոլ Փաշինյանը Չոլպոն-Աթայում մասնակցել է Եվրասիական միջկառավարական խորհրդի նեղ կազմով նիստին: Այս մասին հայտնում են ՀՀ Կառավարությունից։
Հաղորդվում է, որ վարչապետներին դիմավորել է Ղրղզստանի նախարարների կաբինետի նախագահ Ադիլբեկ Կասիմալիևը, որից հետո տեղի է ունեցել համատեղ տեսալուսանկարահանման արարողությունը:
Նիստի սկզբում Ադիլբեկ Կասիմալիևը ողջունել է ներկաներին և շնորհավորել Նիկոլ Փաշինյանին՝ խորհրդարանական ընտրություններում հաղթանակի և ՀՀ վարչապետի պաշտոնում վերանշանակվելու առիթով:
Նշվում է, որ 47-րդ նիստը կկենտրոնանա մաքսային համագործակցության, սննդի անվտանգության և երկաթուղային տրանսպորտի թվայնացման հարցերի վրա:
Նախատեսվում է ԵՏՄ-ի երեք համաձայնագրերի ստորագրում՝ էլեկտրոնային առևտրի, միջնորդներին և դիլերներին միության շրջանակներում բորսայում առևտուր անելու թույլտվության և անդամ պետություններում ակադեմիական աստիճանների փոխադարձ ճանաչման վերաբերյալ:
Հիշեցնենք, որ ՀՀ կառավարությունը հայտնել էր, որ այսօր Չոլպոն-Աթայում կայանալու է Եվրասիական միջկառավարական խորհրդի նեղ կազմով նիստը, ընդլայնված կազմով նիստը կկայանա օգոստոսի 7-ին։