Աշխարհաքաղաքական անորոշությունը մնում է գլխավոր ռիսկը Հայաստանի բանկերի համար․ ՀԲՄ

ԵՐԵՎԱՆ, 5 օգոստոսի․/ԱՌԿԱ/․ Հայաստանի բանկային համակարգի համար խոշորագույն ռիսկը մնում է աշխարհաքաղաքական և տարածաշրջանային անորոշությունը, հայտարարեց Հայաստանի բանկերի միության նախագահ Դանիել Ազատյանը՝ պատասխանելով «ԱՌԿԱ» գործակալության հարցին:

«Բայց մենք ապրում ենք այս իրավիճակում, հավանաբար, արդեն հինգ տարի: Հետևաբար, բանկերը կիրառում են ռիսկերի վրա հիմնված գործիքներ՝ հնարավոր բացասական հետևանքները կանխելու համար», — ասաց նա երեքշաբթի ասուլիսի ժամանակ։

Որպես մեկ այլ էական ռիսկ՝ Ազատյանը նշեց սպառողական վարկերի և ֆիզիկական անձանց այլ փոխառությունների գծով բարձր և աստիճանաբար ավելացող պարտքային բեռը:

«Ուստի պատահական չեն Կենտրոնական բանկի վերջին որոշումները՝ ուղղված բանկերի կապիտալին ներկայացվող պահանջների լրացուցիչ խստացմանը՝ այդ ռիսկերը զսպելու համար», — պարզաբանեց նա:

Հայաստանի Կենտրոնական բանկի խորհուրդը հուլիսի 28-ին որոշում է կայացրել ռիսկով կշռված ակտիվների 2%-ի չափով բարձրացնել անտիցիկլիկ կապիտալի բուֆերի տոկոսադրույքը: Նոր տոկոսադրույքն ուժի մեջ կմտնի 2027 թվականի փետրվարի 1-ից: Հիմա այն կազմում է 1,75%:

ՀԲՄ ղեկավարի խոսքով՝ ընթացիկ անորոշության հնարավոր հետևանքներն առաջին հերթին կարող են անդրադառնալ սպառողական վարկերի պորտֆելի որակի վրա:

Մինչ օրս այս հատվածում էական խնդիրներ չեն նկատվել, քանի որ բիզնեսի վարկավորման ծավալներն ու աշխատատեղերի թիվն աճել են, իսկ բանկերում ռեզիդենտների ավանդներն ավելացել են, նշեց Ազատյանը:

Երկարաժամկետ հեռանկարում նա նույնպես չբացառեց ռիսկերը հիփոթեքային հատվածում: Նրա խոսքով՝ դրանք կարող են կապված լինել ինչպես անշարժ գույքի շուկայում հնարավոր փոփոխությունների, այնպես էլ եկամտային հարկի վերադարձի հաշվին ծածկվող վճարումների մասնաբաժնի աստիճանական կրճատման հետ:

«Տարիների ընթացքում այս հարաբերակցությունը փոխվելու է. մարդիկ ստանալու են եկամտային հարկի ավելի փոքր վերադարձ և ինքնուրույն վճարելու են վարկի մայր գումարի մեծ մասը: Մյուս կողմից, հինգ-յոթ տարի անց այս էֆեկտը կարող է մասնակիորեն փոխհատուցվել գնաճով և աշխատավարձերի աճով», — պարզաբանեց Ազատյանը: