Sony և Marvel ստուդիաների նոր «Սարդ-մարդը. Բոլորովին նոր օր» ֆիլմը անցած հանգստյան օրերին ԱՄՆ-ի ներքին կինովարձույթում հավաքել է 355 մլն դոլար, հաղորդում է CNBC-ն։ Ֆիլմի համաշխարհային դրամարկղային մուտքերը հասել են 927 մլն դոլարի, այդ թվում՝ 121 մլն դոլարը՝ Չինաստանի շուկայից, ինչն այս մեկնարկը դարձնում է ԱՄՆ կինոարտադրության պատմության ամենահաջողվածներից մեկը։
Փորձագետների տվյալներով՝ ֆիլմն ԱՄՆ-ում և Կանադայում դիտել է ավելի քան 24 միլիոն հանդիսատես։ Վաճառված տոմսերի 21%-ը բաժին է ընկել պրեմիում ձևաչափերին, որտեղ մեկ տոմսի միջին արժեքը կազմել է 18.55 դոլար։
Rentrak-ի շուկայական միտումների բաժնի ղեկավար Փոլ Դերգարաբեդյանը նշել է, որ նման հաջողությունը «մեծացնում է հավանականությունը, որ այս ամառ կինոթատրոնների եկամուտները կգերազանցեն 4 միլիարդ դոլարի շեմն առաջին անգամ՝ 2019 թվականից ի վեր»։
Ռեկորդային արդյունքներ են գրանցել նաև Dolby Cinema և Screen X կինոցանցերը։ Dolby Cinema-ն հավաքել է 10 մլն դոլար, իսկ Screen X-ը՝ 7 մլն դոլար՝ չնայած այն հանգամանքին, որ ֆիլմը չի ցուցադրվել IMAX ձևաչափով։
Փիթեր Փարքերի արկածների նոր մասը դարձել է ընդամենը երկրորդ հոլիվուդյան նախագիծը, որը կարողացել է ներքին շուկայում դեբյուտային հանգստյան օրերին հաղթահարել 300 մլն դոլարի սահմանագիծը։
Նման արդյունքի հասած առաջին ֆիլմը եղել է Disney-ի «Վրիժառուները. Վերջնախաղը» (Avengers: Endgame) բլոկբաստերը, որը յոթ տարի առաջ սահմանել էր բացարձակ ռեկորդ՝ մեկնարկային հանգստյան օրերին հավաքելով 357 մլն դոլար։