Փաշինյանը հայտարարել է, որ ԵԱՏՄ-ի և Ռուսաստանի շուկայի հետ կապված իրավիճակը շատերը ճգնաժամ են համարում, սակայն ինքը դա համարում է հնարավորություն
ԵՐԵՎԱՆ, 30 հուլիսի․/Նովոստի–Արմենիա/․ ՀՀ վարչապետ Նիկոլ Փաշինյանը հայտարարել է, որ ԵԱՏՄ-ի և Ռուսաստանի շուկայի հետ կապված իրավիճակը շատերը ճգնաժամ են համարում, սակայն ինքը դա համարում է հնարավորություն։
«Սա ճգնաժամ չէ, սա հնարավորություն է։ Սա պատուհան է, որը մենք ինքներս ենք բացել մեր առաջ», – ասաց Փաշինյանը կառավարության նիստի ժամանակ։
Նա ընդգծեց, որ այս ուղղությամբ պետական աջակցությունը պետք է ուղղված լինի զարգացմանը։
«Այս աջակցության արդյունքում մարդիկ պետք է նույն կետի վրա չմնան, պետք է առաջ գնան», – նշեց վարչապետը։
Նրա խոսքով` ավարտվել է այն դարաշրջանը, երբ Հայաստանը չունի այլընտրանք։
«Մենք ամեն տեղ և անընդհատ պետք է ունենանք այլընտրանք», – հայտարարեց Փաշինյանը։
Ռուսաստան հայկական ապրանքների մատակարարումների սահմանափակումների մասին
Ռուսաստանը մայիսի վերջից փուլ առ փուլ սահմանափակումներ է մտցնում Հայաստանից մի շարք ապրանքատեսակների մատակարարումների վրա՝ դա բացատրելով բուսասանիտարական պահանջների խախտումներով:
Սահմանափակումների տակ են հայտնվել ծաղկային արտադրանքը, հանքային ջուրը և ալկոհոլային արտադրանքի որոշ տեսակներ, բանջարեղենը, միրգը, հատապտուղները, խաղողը, կարտոֆիլը, չրեղենը, ավելի ուշ՝ կենդանի ձուկը և ձկնամթերքը, իսկ հուլիսի 27-ից՝ կաթնամթերքը:
Սահմանափակումները ներառում են նաև Ռուսաստանի տարածքով հայկական ծագման արտադրանքի տարանցման արգելք դեպի ԵԱՏՄ այլ երկրներ: