ՀՀ բարձր տեխնոլոգիական արդյունաբերության նախարար Մխիթար Հայրապետյանն այցելել է Firebird AI ընկերության՝ Հրազդան քաղաքում գտնվող արհեստական բանականության տվյալային կենտրոն
ԵՐԵՎԱՆ, 29 հուլիսի․/ԱՌԿԱ/․ ՀՀ բարձր տեխնոլոգիական արդյունաբերության նախարար Մխիթար Հայրապետյանն այցելել է Firebird AI ընկերության՝ Հրազդան քաղաքում գտնվող արհեստական բանականության (ԱԲ) տվյալային կենտրոն։
Ինչպես հայտնում է նախարարության մամուլի ծառայությունը, շրջայցի ընթացքում նախարարին ուղեկցել է Firebird AI-ի համահիմնադիր Ալեքսանդր Եսայանը։
Այցի շրջանակում նախարար Հայրապետյանը ծանոթացել է «ԱԲ գործարանի» ընթացիկ վիճակին, շահագործման նախապատրաստական աշխատանքներին, տեխնոլոգիական ենթակառուցվածքներին, բարձր արտադրողականությամբ հաշվարկային համակարգերին, ինչպես նաև բացման հանդիսավոր արարողությունից առաջ իրականացվող վերջին տեխնիկական աշխատանքներին։ Քննարկվել են նաև նախագծի հետագա զարգացման փուլերը։
«Firebird-ի իրականացրած այս ռազմավարական նախագիծը կարևոր նշանակություն ունի Հայաստանի տեխնոլոգիական զարգացման և միջազգային մրցունակության բարձրացման տեսանկյունից՝ ձևավորելով նոր հնարավորություններ գիտահետազոտական համայնքի, ստարտափների, բարձր տեխնոլոգիական ընկերությունների և պետական հատվածի համար»,- ընդգծել է Մխիթար Հայրապետյանը։
Նախագիծն աչքի է ընկնում իր մասշտաբներով․
- 1-ին փուլ. Ներդրումների ծավալը կազմում է 500 միլիոն ԱՄՆ դոլար (ներառում է 6,144 NVIDIA Blackwell սերնդի գրաֆիկական պրոցեսորներ):
- 2-րդ փուլ. Ներդրումները կհասնեն շուրջ 5 միլիարդ ԱՄՆ դոլարի՝ շահագործման հանձնելով ևս մոտ 42,000 գրաֆիկական պրոցեսոր։
ՀՀ կառավարության և Firebird ընկերության համատեղ համագործակցության շնորհիվ Հայաստանը տեխնոլոգիաների սպառողից վերածվում է աշխարհին արհեստական բանականության բարձր տեխնոլոգիական արդյունք և լուծումներ առաջարկող երկրի։