Հայաստանի բնակիչների շուրջ երկու երրորդը մնում է աղքատ կամ խոցելի․ ՀԲ-ն նշել է հիմնական պատճառները

ԵՐԵՎԱՆ, 29 հուլիսի․/ԱՌԿԱ/․   Հայաստանում աղքատության մակարդակը, ազգային մեթոդաբանության համաձայն, 2021 թվականի 26,5%-ից 2024 թվականին նվազել է մինչև 21,7%, սակայն բնակչության շուրջ երկու երրորդը մնում է աղքատ կամ տնտեսապես խոցելի, հայտարարել է Համաշխարհային բանկի ավագ տնտեսագետ Արմինե Մանուկյանը։

«Վերջին տարիներին Հայաստանի տնտեսական աճը բավականին տպավորիչ է եղել, իսկ աղքատության մակարդակը նվազում էր։ Սակայն բարձր աճի առավելություններից ոչ բոլորն են օգտվում հավասարապես»,- ասել է Մանուկյանը ՀԲ «Հայաստանի տնտեսական զարկերակը. ձգտելով աղքատությունը նվազեցնող աճի՝ավելի ներգործուն հարկաբյուջետային քաղաքականությամբ» զեկույցի շնորհանդեսի ժամանակ։

Խոցելի է մնում բնակչության 43,4%-ը

2024 թ.-ին տնտեսապես խոցելի բնակչության մասնաբաժինը կազմել է 43,4%: Այս խմբին Համաշխարհային բանկը դասում է այն քաղաքացիներին, ում սպառումը մեկ շնչի հաշվով աղքատության ազգային գծից բարձր է ոչ ավելի, քան 1,5 անգամ:

Այսպիսով, աղքատ և խոցելի բնակիչների համախառն մասնաբաժինը հասել է 65,1%-ի:

Մանուկյանի խոսքով՝ նման տնային տնտեսությունները աշխատանքի կորստի, եկամուտների նվազման կամ այլ տնտեսական ցնցումների դեպքում կարող են կրկին հայտնվել աղքատության գծից այն կողմ:

Բարեկեցության միջին մակարդակ ունեցող բնակչության մասնաբաժինը 2021 թ.-ի 20,2%-ից 2024 թ.-ին հասել է 24,9%-ի:

Աղքատությունն ավելի բարձր է գյուղական վայրերում

Գյուղական վայրերում աղքատության մակարդակը 2024 թ.-ին կազմել է 26,1%, Երևանից դուրս գտնվող քաղաքներում՝ 22,8%, իսկ մայրաքաղաքում՝ 16,9%, նշել է Մանուկյանը:

Ամենաբարձր ցուցանիշներն արձանագրվել են Շիրակի և Տավուշի մարզերում՝ համապատասխանաբար մոտ 49% և 47%: Աղքատության ամենացածր մակարդակը գրանցվել է Սյունիքի մարզում:

Համաշխարհային բանկը աղքատության տարածաշրջանային կենտրոնացումը կապում է գյուղատնտեսության ոլորտում ցածր արտադրողականությամբ զբաղվածության, ինքնազբաղվածության և ոչ ֆորմալ աշխատանքի հետ:

Գյուղատնտեսությանը բաժին է ընկնում Հայաստանում զբաղվածության մոտ մեկ քառորդը և աշխատող աղքատների մոտ մեկ երրորդը:

Միջազգային չափանիշով աղքատ է համարվում 47,4%-ը

Միջինից բարձր եկամուտ ունեցող երկրների համար աղքատության միջազգային գծով (օրական 8,3 դոլար մեկ անձի հաշվով՝ ըստ 2021 թվականի գնողունակության պարիտետի) Հայաստանում աղքատության մակարդակը 2024 թ.-ին կազմել է 47,4%:

Ընդ որում, Համաշխարհային բանկը Հայաստանում անհավասարության մակարդակը գնահատում է համեմատաբար ցածր՝ համադրելի երկրների մեծ մասի համեմատ: Միջազգայնորեն համադրելի Ջինիի ինդեքսը կազմում է 27,4:

Աշխատանքը միշտ չէ, որ պաշտպանում է աղքատությունից

Զեկույցում նշվում է, որ աշխատանքի առկայությունն ինքնին չի երաշխավորում աղքատությունից դուրս գալը: Վճռորոշ նշանակություն ունեն զբաղվածության արտադրողականությունը, կայունությունը և ֆորմալ բնույթը:

Աղքատ աշխատողներն ավելի հաճախ զբաղված են գյուղատնտեսության ոլորտում, աշխատում են ոչ ֆորմալ կամ ինքնազբաղված են: Աղքատության ամենացածր մակարդակը նկատվում է գրավոր աշխատանքային պայմանագրեր ունեցող աշխատողների շրջանում:

Աղքատության կայուն նվազեցման համար Համաշխարհային բանկը հանձնարարում է բարձրացնել աշխատատեղերի որակը, ընդլայնել ֆորմալ զբաղվածությունը, կատարելագործել աշխատողների մասնագիտական հմտությունները և բարելավել սոցիալական աջակցության հասցեականությունը: