Չինաստանի արտաքին գործերի նախարարության պաշտոնական ներկայացուցիչ Լին Ցզյանը հայտարարել է արհեստական բանականության տեխնոլոգիաների ոլորտում ԱՄՆ-ի հետ ձեռք բերված պայմանավորվածությունների իրականացման անհրաժեշտության մասին։
Այս հայտարարությունը հնչել է ճեպազրույցի ժամանակ՝ ի պատասխան Չինաստանի նախագահ Սի Ցզինպինի՝ ԱՄՆ կատարելիք այցի հեռանկարների վերաբերյալ հարցին։
«Չինաստանը պատրաստ է ԱՄՆ-ի հետ համատեղ արդյունավետորեն իրականացնել երկու երկրների առաջնորդների՝ արհեստական բանականության ոլորտում ձեռք բերած կարևոր պայմանավորվածությունները», – նշել է դիվանագետը։
Լին Ցզյանը չի հաստատել կամ հերքել այն տեղեկությունը, թե Չինաստանի առաջնորդը սեպտեմբերի 24-ին կայցելի ԱՄՆ։ Նա ասել է, որ պետությունների ղեկավարների դիվանագիտությունն անփոխարինելի ռազմավարական դեր է խաղում չին-ամերիկյան հարաբերությունների զարգացման ուղղությունը որոշելու գործում։
Ավելի վաղ ԱՄՆ նախագահ Դոնալդ Թրամփը հայտնել էր, որ Սի Ցզինպինի այցը ԱՄՆ կսկսվի սեպտեմբերի 24-ին։ Նրա խոսքով՝ Վաշինգտոնն ակնկալում է Չինաստանի առաջնորդի այցը՝ ի պատասխան Սպիտակ տան ղեկավարի՝ Պեկին կատարած այցի, որը տեղի էր ունեցել մայիսի 14-15-ին։