Google-ի մայր ընկերությունը՝ Alphabet Inc.-ը, 2026 ֆինանսական տարվա երկրորդ եռամսյակում (ապրիլ–հունիս) չորս անգամ ավելացրել է զուտ շահույթը, իսկ հասույթն աճել է 24%-ով։
Ընկերության զուտ շահույթը կազմել է 112.107 միլիարդ դոլար, կամ 9.11 դոլար մեկ բաժնետոմսի հաշվով, մինչդեռ մեկ տարի առաջ այն կազմում էր 28.196 միլիարդ դոլար, կամ 2.31 դոլար մեկ բաժնետոմսի հաշվով։ Այս ցուցանիշը ներառում է 99 միլիարդ դոլարի չափով բաժնային գործիքներում ներդրումներից ստացված զուտ շահույթ, որի հիմնական մասը դեռևս չիրացված է (unrealized)։
Alphabet-ի հասույթն աճել է մինչև 119.796 միլիարդ դոլար՝ նախորդ տարվա 96.428 միլիարդ դոլարի դիմաց։ Արտարժույթի փոխարժեքների ազդեցությունը բացառելու դեպքում հասույթի աճը կազմել է 23%։ FactSet-ի հարցված վերլուծաբանները միջինում կանխատեսել էին 2.88 դոլար շահույթ մեկ բաժնետոմսի հաշվով և 117.06 միլիարդ դոլար հասույթ։
Հաշվետու եռամսյակում Google-ի գովազդային եկամուտներն աճել են 14%-ով՝ հասնելով 81.63 միլիարդ դոլարի։ Դրանցից որոնողական համակարգի գովազդից ստացված եկամուտը կազմել է 63.17 միլիարդ դոլար (աճ՝ 17%), իսկ YouTube-ի գովազդային եկամուտը՝ 11.06 միլիարդ դոլար (աճ՝ 13%)։ Միևնույն ժամանակ Google Cloud ծառայության հասույթն աճել է 82%-ով՝ մինչև 24.77 միլիարդ դոլար։
Միաժամանակ հոլդինգի ազատ դրամական հոսքը (free cash flow) դարձել է բացասական՝ կազմելով -5.86 միլիարդ դոլար, մինչդեռ նախորդ եռամսյակում այն եղել էր +10.12 միլիարդ դոլար։ Բացի այդ, ընկերությունն անսպասելիորեն բարձրացրել է 2026 թվականի կապիտալ ծախսերի (capital expenditures) կանխատեսումը՝ 180–190 միլիարդ դոլարից մինչև 195–205 միլիարդ դոլար։
Ֆինանսական հաշվետվության հրապարակումից հետո Alphabet-ի շուկայական կապիտալիզացիան հետբորսայական առևտրի ընթացքում նվազել է 3.3%-ով։