ԵՄ փորձագետները մասնակցում են ՀՀ–ում էներգիայի կուտակման համակարգերի կարգավորման և էլեկտրաէներգիայի շուկայի բարեփոխումներին նվիրված քննարկմանը

ԵՐԵՎԱՆ, 23 հուլիսի․/ԱՌԿԱ/․ ՀՀ հանրային ծառայությունները կարգավորող հանձնաժողովում հուլիսի 21-ին մեկնարկել են Եվրոպական միության փորձագետների մասնակցությամբ Հայաստանի էլեկտրաէներգիայի շուկայի բարեփոխմանը և էլեկտրաէներգիայի պահեստավորման կարգավորման հարցերին նվիրված քննարկումները։

Միջոցառումն անցկացվում է «Մաքուր էներգիայի անցման և փոխկապակցման խթանումն Արևելյան գործընկերության երկրներում» նախաձեռնության ներքո իրականացվող «ԵՄ-ն հանուն էներգետիկայի» ծրագրի շրջանակում։

ՀՀ հանրային ծառայությունները կարգավորող հանձնաժողովի նախագահ Մեսրոպ Մեսրոպյանը, ողջունելով միջոցառման մասնակիցներին, կարևորել է Հայաստանի էլեկտրաէներգիայի շուկայի շարունակական բարեփոխումների գործընթացում Եվրոպական միության և այլ միջազգային գործընկերների հետ համագործակցությունը։ Նրա խոսքով՝ նման ձևաչափերը նպաստում են ժամանակակից կարգավորող լուծումների մշակմանը, միջազգային լավագույն փորձի ներդրմանը և ոլորտի կայուն զարգացմանը։

Ողջույնի խոսքով հանդես է եկել նաև «ԵՄ-ն հանուն էներգետիկայի» ծրագրի հայաստանյան գրասենյակի ղեկավար Արմին Բյումը՝ անդրադառնալով Հայաստանի և Եվրոպական միության միջև էներգետիկ ոլորտում գործընկերության կարևորությանը և ծրագրի շրջանակում իրականացվող աշխատանքներին։

Քննարկումների ընթացքում կներկայացվեն «ԵՄ-ն հանուն էներգետիկայի» ծրագրի շրջանակում իրականացված աշխատանքների արդյունքները, որոնք վերաբերում են «Էներգետիկայի մասին» ՀՀ օրենքի գնահատմանը, դրանից բխող ենթաօրենսդրական իրավական ակտերի քարտեզագրմանը և դրանց առաջնահերթությունների սահմանմանը, Հայաստանի օրենսդրության հնարավոր ներդաշնակեցմանը Էներգետիկ համայնքի իրավական համակարգին, ինչպես նաև էլեկտրաէներգիայի պահեստավորման ոլորտի կարգավորումների մշակմանը։

Միջոցառման նպատակն է նպաստել էներգետիկ ոլորտում Հայաստանի և Եվրոպական միության միջև փոխգործակցության խորացմանը, ինչպես նաև աջակցել արդյունավետ, ժամանակակից ու եվրոպական լավագույն փորձին համահունչ կարգավորումների մշակմանն ու ներդրմանը։

Օրենսդրական նախաձեռնությունների մասին

Հայաստանում նախատեսվում է ներդնել էլեկտրաէներգիայի կուտակման գործունեության լիցենզավորում։ Այս նպատակով 2026 թվականի ապրիլի 1-ին կառավարությունը հավանություն է տվել «Էներգետիկայի մասին», «Լիցենզավորման մասին» և «Պետական տուրքի մասին» օրենքներում համապատասխան փոփոխություններին։

Նախագծի համաձայն՝ լիցենզիաները տրամադրելու է Հանրային ծառայությունները կարգավորող հանձնաժողովը։ Լիցենզավորված ընկերությունները կկարողանան լիցենզիայում նշված տարածքում կուտակել էլեկտրաէներգիա, ինչպես նաև գնել և վաճառել այն մեծածախ շուկայում։

Լիցենզավորում չի պահանջվի մինչև 1 ՄՎտ հզորությամբ կայանների, ինչպես նաև 1 ՄՎտ-ից ավելի հզորությամբ կայանների համար, եթե դրանք օգտագործվում են բացառապես սեփական կարիքների համար։

Զուգահեռաբար, իշխանությունները քննարկում են հնարավոր տեխնոլոգիական լուծումները և համագործակցությունը միջազգային ընկերությունների, այդ թվում՝ Huawei-ի և Զարգացման շվեյցարական կազմակերպության (Helvetas Swiss Intercooperation) հետ։

Փորձագետի գնահատականը

«ԱՌԿԱ» գործակալությանը տված հարցազրույցում տնտեսագետ Հրանտ Միքայելյանը էլեկտրաէներգիայի կուտակման ոլորտում գործունեության լիցենզավորման վերաբերյալ Հայաստանի կառավարության նախաձեռնությունն անվանել է ժամանակին արված և կարևոր քայլ։

Միևնույն ժամանակ, փորձագետը նշել է, որ վերջնական արդյունքը կախված կլինի դրա իրականացման ժամկետներից։

«Եթե այս նախաձեռնությունն իրականացվի, դա կլինի շատ ժամանակին արված և կարևոր քայլ։ Սակայն այստեղ կարևոր է հասնել արդյունքի և, ամենակարևորը, հասկանալ, թե ինչ ժամկետներում։ Մենք արդեն տեսել ենք ժամանակացույցերի հապաղումներ, օրինակ՝ ջրամբարների շինարարության ժամանակ», — ասել է Միքայելյանը։