Իրանի զինված ուժերը հայտարարել են, որ անօդաչու թռչող սարքերի միջոցով հարվածներ են հասցրել Քուվեյթի տարածքում գտնվող ամերիկյան երեք ռազմական օբյեկտի։ Իրանական կողմի տվյալներով՝ գործողությունն իրականացվել է «Կայծակ» անվանումը կրող ռազմական գործողության շրջանակում։
Իրանի զինված ուժերի մամուլի ծառայության հաղորդմամբ՝ հարվածներ են հասցվել «Արեֆջան» ռազմաբազայի վարչական շենքերին և կապի համակարգերին, «Ալ-Ադիրի» ճամբարում գտնվող ուղղաթիռների կայանատեղիին, ինչպես նաև «Ահմադ ալ-Ջաբեր» ռազմաբազայի անձնակազմի տեղակայման շենքին։
Իրանական կողմը նշում է, որ «Արեֆջան» ռազմաբազան տարածաշրջանում ԱՄՆ ցամաքային զորքերի կառավարման և տեղակայման հիմնական կենտրոններից մեկն է, «Ալ-Ադիրի» ճամբարը նախատեսված է ուղղաթիռային տեխնիկայի տեղակայման համար, իսկ «Ահմադ ալ-Ջաբեր» ռազմաբազան օգտագործվում է ավիացիոն գործողությունների և հետախուզական առաքելությունների ապահովման նպատակով։