ԱՄՆ Դաշնային պահուստային համակարգը պետք է ավելի հուսալի պաշտպանություն ապահովի գաղտնի տնտեսական տեղեկատվության համար, որը փորձում են ձեռք բերել օտարերկրյա հակառակորդները։ Այս մասին հայտարարել է կենտրոնական բանկի ներքին վերահսկող մարմինը։
Գլխավոր տեսուչի գրասենյակը հրապարակել է զեկույց, ըստ որի՝ ԴՊՀ-ի ռիսկերի կառավարման համակարգերը չեն բացահայտում ծառայողական տվյալների և տեղեկատվության նկատմամբ առկա սպառնալիքները։ Վերահսկող մարմնի գնահատմամբ՝ կենտրոնական բանկը չունի կարևորագույն ակտիվների և ներքին ռիսկերի նույնականացման անհրաժեշտ ընթացակարգեր։
Զեկույցում նաև նշվում է, որ ԴՊՀ-ում բացակայում են համապատասխան վերապատրաստման ծրագրերն ու տեղեկատվության փոխանակման արդյունավետ գործընթացները։
Գլխավոր տեսուչը նշել է, որ ԴՊՀ-ի Կառավարիչների խորհրդի ծառայողական տնտեսական տեղեկատվությունը զգալի հետաքրքրություն է ներկայացնում օտարերկրյա հակառակորդների համար, որոնք ձգտում են թուլացնել ԱՄՆ-ի մրցունակությունն ու ազգային անվտանգությունը։ Զեկույցում ընդգծվում է, որ սպառնալիքները կարող են ծագել նաև կազմակերպության ներսից, օրինակ՝ այն դեպքում, երբ աշխատակիցը գիտակցաբար կամ անգիտակցաբար գաղտնի տեղեկատվություն է փոխանցում օտարերկրյա գործակալներին։
Վերահսկող մարմինը ներկայացրել է կենտրոնական բանկի պաշտպանության ուժեղացմանն ուղղված ինը առաջարկություն, այդ թվում՝ Կառավարիչների խորհրդի կարևորագույն ակտիվների նույնականացման և ռիսկերի գնահատման մեթոդների մշակման վերաբերյալ։