Իրանի շուրջ լարվածությունն ուժեղացնում է ռիսկերը լոգիստիկայի, տուրիզմի և գնաճի համար Հայաստանում․ տնտեսագետ

ԵՐԵՎԱՆ, 18 հուլիսի․/ԱՌԿԱ/․ Մերձավոր Արևելքում, այդ թվում՝ Իրանի շուրջ պահպանվող լարվածությունը Հայաստանի տնտեսության համար մեծացնում է ռիսկերը լոգիստիկայի, ուղևորափոխադրումների, զբոսաշրջության և գնային կայունության ոլորտներում, կարծում է տնտեսագետ Հրանտ Միքայելյանը:

«ԱՌԿԱ» գործակալությանը տված հարցազրույցում նա նշեց, որ գլխավոր ռիսկն ունի գլոբալ բնույթ. հետագա էսկալացիան կարող է վատթարացնել համաշխարհային տնտեսական կոնյունկտուրան և Հայաստանի համար ստեղծել արտաքին ռիսկեր, որոնք իրենց բնույթով համադրելի են նախորդ գլոբալ ճգնաժամերի հետևանքների հետ:

Միքայելյանի գնահատմամբ՝ ընթացիկ իրավիճակն ավելի ուժեղ է ազդում ուղևորափոխադրումների, քան բեռնափոխադրումների վրա։ Նա մատնանշեց ավիաթռիչքների թանկացումը, ինչը հատկապես զգայուն է Հայաստանի համար՝ հաշվի առնելով նրա աշխարհագրական դիրքը։

Տնտեսագետը նաև նշեց, որ էներգակիրների՝ բենզինի, դիզվառելիքի, հեղուկ գազի գներն արդեն աճել են մոտ 20-25%-ով։ Էներգակիրների արժեքի աճը կարող է փոխանցվել գներին և ուժեղացնել գնաճային ճնշումը։ Ընդ որում, նման էֆեկտի մասշտաբն ու տևողությունը կախված կլինեն տարածաշրջանային իրավիճակի հետագա զարգացումից և համաշխարհային գների դինամիկայից։

Առավել զգայուն ոլորտները

Իրավիճակի սրման նկատմամբ առավել զգայուն ոլորտներ փորձագետն անվանեց զբոսաշրջությունը և ուղևորահոսքի հետ կապված ուղղությունները, ինչպես նաև Իրանի, ԱՄԷ-ի և Պարսից ծոցի երկրների հետ առևտրի լոգիստիկան։

Նրա կարծիքով՝ արժութային շուկայի և գնաճի համար անորոշության լրացուցիչ գործոն են մնում Հայաստանի արտաքին տնտեսական կապերը, ներառյալ Ռուսաստանի հետ հարաբերությունների դինամիկան։

Ընդհանուր առմամբ, ըստ Միքայելյանի, սա ստեղծում է տարածաշրջանային անկայունություն և ռազմաքաղաքական ռիսկեր Հայաստանի համար, այդ թվում՝ հաշվի առնելով չդադարող ռուս-ուկրաինական հակամարտությունը և Ադրբեջանի կողմից պահպանվող ռիսկերը։

Խոսելով նոր հնարավորությունների մասին, որոնք Հայաստանը կարող է քաղել այս իրավիճակից, փորձագետը նշեց, որ նման հարցով պետք է զբաղվեն պրոֆիլային պետական ինստիտուտները։

«Հնարավոր է, որ նման հնարավորություններ կան։ Բայց այս պահին ես դժվարանում եմ դրանք անվանել, որովհետև կարծում եմ, որ այստեղ լուրջ հետազոտություններ են պետք, հատկապես հաշվի առնելով, որ իրավիճակը շատ արագ է փոխվում»,- եզրափակեց նա։