Եվրոպական խորհրդարանը բանաձև է ընդունել, որով առաջին անգամ կիպրացի կանանց և աղջիկներին ճանաչել է 1974 թվականին Թուրքիայի կողմից Կիպրոս ներխուժման ժամանակ կատարված հանցագործությունների զոհեր։
Օրենսդիրները ձայների 575 կողմ, 33 դեմ հարաբերակցությամբ ընդունել են օրինագիծը՝ հիմնվելով հունական «Նոր դեմոկրատիա» կուսակցության հույն պատգամավոր Էլեոնորա Մելեթիի զեկույցի վրա։
Բանաձևը դատապարտում է Թուրքիայի ներխուժումը և շարունակական օկուպացիան, ճանաչում սեռական բռնությունը որպես պատերազմի զենք և կոչ է անում վերականգնել զոհերին, փոխհատուցել և աջակցել նրանց, պատասխանատվության ենթարկել Թուրքիային՝ համաձայն միջազգային իրավունքի։
Ստրասբուրգում ԵԽ-ում ունեցած ելույթում Մելեթին նկարագրել է FEMM (Կանանց իրավունքների և գենդերային հավասարության կոմիտե) առաքելության ներկայացուցիչների՝ Կիպրոս կատարած այցի ընթացքում հանդիպած կանանց վկայությունները՝ ասելով, որ նրանց նկատմամբ բռնությունը «շարունակվել է խարանի, մեկուսացման, մարգինալացման, մերժման, միայնության միջոցով»։ Աջակիցները քվեարկությունն անվանել են կիպրոսցի կանանց քաղաքական և բարոյական արդարացում։
Պաշտոնական Անկարան դատապարտել է բանաձևը։
«Եվրախորհրդարանի կողմից ընդունված բանաձևը, որը պարունակում է անհիմն և անհեթեթ մեղադրանքներ հերոսական թուրքական զինված ուժերի դեմ, առոչինչ է։ Մենք լիովին աջակցում ենք Հյուսիսային Կիպրոսի թուրքական հանրապետության արտաքին գործերի նախարարության կողմից բանաձևի վերաբերյալ արված հայտարարությանը»,- ասվում է Թուրքիայի ԱԳՆ հայտարարության մեջ։
Նշվում է, թե այս բանաձևը, որը «լի է զրպարտություններով», Կիպրոսի հարցի նկատմամբ Եվրամիության, մասնավորապես, Եվրախորհրդարանի կողմից որոշակի շրջանակների ազդեցության տակ որդեգրված կողմնակալ և աղավաղված մոտեցման վերջին օրինակն է։
Ըստ Անկարայի՝ մտահոգիչ է, որ Եվրամիության ինստիտուտները Կիպրոսի հարցին ավելի ու ավելի են մոտենում «պատմական իրողություններից և անաչառությունից շեղվող ձևով»։
Թարգմանությունը՝ Էմմա Չոբանյանի