Այսօր Թուրքիայի մայրաքաղաք Անկարայում մեկնարկում է ՆԱՏՕ-ի պետությունների և կառավարությունների ղեկավարների 36-րդ գագաթնաժողովը։ Թուրքական լրատվամիջոցների հաղորդմամբ՝ երկու օրվա ընթացքում Անկարայի նախագահական համալիրը կհյուրընկալի դաշինքի անդամ 32 երկրների ղեկավարներին, ինչպես նաև հազարավոր դիվանագետների, լրագրողների և ֆորումի այլ մասնակիցների:
Գագաթնաժողովի օրակարգում են ՆԱՏՕ-ի զսպման և պաշտպանության դիրքերի ամրապնդումը, եվրատլանտյան անվտանգությունը, պաշտպանական ծախսերը, դաշինքի ռազմավարական զարգացման նպատակները, ինչպես նաև տարածաշրջանային և գլոբալ անվտանգության հարցերը: Գագաթնաժողովի շրջանակում նախատեսված են նաև առաջնորդների միջև երկկողմ հանդիպումներ, մի շարք լրացուցիչ միջոցառումներ:
Անկարայում անհրաժեշտ բոլոր նախապատրաստական աշխատանքները ավարտվել են, այդ թվում՝ անվտանգության, լոգիստիկայի, կապի և տեխնոլոգիական ենթակառուցվածքների ապահովումը, հաղորդում է թուրքական կողմը։
Պաշտոնական պատվիրակություններին ընդունելու համար կօգտագործվեն Էսենբողա, Անկարա և Մյուրտեդ օդանավակայանները: Թուրքիայի նախագահ Ռեջեփ Թայիփ Էրդողանի և ՆԱՏՕ-ի գլխավոր քարտուղար Մարկ Ռյուտեի նախագահությամբ կայանալիք գագաթնաժողովը կտևի երկու օր։ ԱՄՆ նախագահ Դոնալդ Թրամփից բացի՝ գագաթնաժողովին կմասնակցեն 31 դաշնակից երկրների և հրավիրված պետությունների ղեկավարներ։
Երկու օրվա ընթացքում կքննարկվեն դաշինքի ապագան ձևավորող գլոբալ և տարածաշրջանային անվտանգության հարցեր: Օրակարգի գլխավոր թեման անցյալ տարվա Հաագայի գագաթնաժողովում ստանձնած պարտավորությունների կատարումն է, որոնք նախատեսում են, որ դաշնակիցները մինչև 2035 թվականը պաշտպանությանը կհատկացնեն իրենց համախառն ներքին արդյունքի 5 տոկոսը։
«Ակնկալում եմ, որ Անկարայում երկրները կներկայացնեն հստակ, շոշափելի և հավաստի ծրագրեր՝ այս 5 տոկոսի նպատակին հասնելու համար»,- գագաթնաժողովից առաջ Անկարայում կայացած մամուլի ասուլիսում ասել է ՆԱՏՕ-ի գլխավոր քարտուղարը։
Ռյուտեն նաև հայտարարել է, որ այսօր ՆԱՏՕ-ի գագաթնաժողովի պաշտպանական արդյունաբերության ֆորումում կհայտարարվի տասնյակ միլիարդավոր դոլար արժողությամբ նոր պայմանագրերի մասին, որոնք կապահովեն զսպման և պաշտպանության համար անհրաժեշտ սարքավորումներ։
Գագաթնաժողովում, որը տեղի է ունենում Ուկրաինայի վրա Ռուսաստանի շարունակական հարձակումների ֆոնին, կարևոր թեմաներից է Կիևին շարունակական աջակցության անհրաժեշտությունը, մասնավորապես, օդային պաշտպանության հարցում։
Մարկ Ռյուտեն ընդգծել է, որ բոլոր դաշնակիցները «պետք է իրենց դերը կատարեն» այս հարցում, միաժամանակ, Չինաստանին, Հյուսիսային Կորեային և Իրանին բնութագրելով որպես Ռուսաստանի ներխուժման փորձի «գլխավոր կողմնակիցներ»։
Փորձագետները նշում են, որ մի ժամանակաշրջանում, երբ անորոշությունը շարունակվում է Եվրոպայում ԱՄՆ-ի երկարաժամկետ դերի վերաբերյալ, և Եվրոպան ապրում է Երկրորդ համաշխարհային պատերազմից ի վեր իր ամենավտանգավոր շրջաններից մեկը, Անկարայում վճռական որոշումներ կարող են կայացվել։
Թարգմանությունը՝ Էմմա Չոբանյանի