Ինչո՞ւ հայ-ամերիկյան կանոնադրությունը չի դրվում վավերացման, ինչպես սահմանազատման հանձնաժողովինն արվեց. Հակոբ Բադալյան

Հակոբ Բադալյանը գրում է.

 Մեկ այլ հարց է, թե ինչու՞ օրինակ Հայաստանի եւ Ադրբեջանի միջեւ սահմանազատման ու սահմանագծման հանձնաժողովների աշխատանքային կանոնադրությունը Հայաստանում անցել է ներպետական լիարժեք վավերացում՝ կառավարություն, ՍԴ, խորհրդարան, նախագահ, իսկ ահա Հայաստան-ԱՄՆ ռազմավարական գործընկերության հանձնաժողովների կանոնադրությունը չի անցնում վավերացման նույն գործընթացը:

Չէ՞ որ երկուսն էլ միջպետական հանձնաժողովների աշխատանքային կանոնադրություն են: Հետեւաբար ինչու՞ է տարբերակված մոտեցում: Որովհետեւ մեկը սահմանային, այսինքն տաևածքային հարցերի մասին է, իսկ մյուսը՝ ոչ: Դա չի կարող լինել բացատրություն, որովհետեւ երկուսն էլ ընդամենը հանձնաժողովների աշխատանքային կանոնադրություն են, ոչ ավելի:

Եվ, ավելին, չէ՞ որ Թրամպի ուղին՝ որը առնչվում է Հայաստանի տարածքին, ներկայացվում է իբրեւ հայ-ամերիկյան ռազմավարական գործընկերության արդյունք, արգասիք:

Ըստ այդմ, ինչու՞ է հայ-ադրբեջանական սահմանազատման ու սահմանագծման հանձնաժողովի աշխատանքային կանոնադրությունը անցել լիարժեք վավերացում՝ ինչը ենթադրվում է այն դեպքերում, երբ վավերացվող թղթով սահմանվում է պետության պարտավորություն, իսկ հայ-ամերիկյան կանոնադրությունը՝ չի դրվում այդպիսի վավերացման: