Փարիզը և Դամասկոսը քննարկում են Բաշար ալ-Ասադի հորեղբորից՝ Սիրիայի նախկին փոխնախագահ Ռիֆաթ ալ-Ասադից ֆրանսիական իշխանությունների կողմից բռնագրավված 32 միլիոն եվրոն Սիրիային փոխանցման հարցը, գրել է «The National»-ը։
«Գաղափարն այն է, որ կոռումպացված ռեժիմի կողմից գողացված գումարը պետք է վերադարձվի այն մարդկանց, որոնցից այն գողացվել է», – նշել է ֆրանսիական դիվանագիտական աղբյուրը:
Այս հարցի շուրջ բանակցությունները, ըստ տեղեկությունների, սկսվել են այս շաբաթ՝ արդարադատության փոխնախարար Մուստաֆա ալ-Քասիմի և գլխավոր դատախազ Հասան Յուսեֆ ալ-Թուրբայի գլխավորած պատվիրակության՝ Ֆրանսիա կատարած այցի ժամանակ: Վերջիներս հույս ունեն, որ այս համաձայնագիրը կկնքվի մինչև տարեվերջ:
Ֆրանսիայի արդարադատության նախարարության ներկայացուցիչը հրատարակությանը հայտնել է, որ իշխանությունները ներկայումս վերահսկում են Ասադի բռնագրավված 47 միլիոն եվրոյի ակտիվի ընդհանուր գումարի վաճառքը: Նա ասել է, որ այս գումարի և քննարկվող գումարի միջև տարբերությունը պայմանավորված է նրանով, որ վաճառքից ստացված բոլոր եկամուտները դեռևս չեն մուտքագրվել պետական բյուջե:
Հաֆեզ ալ-Ասադի եղբայրը՝ Ռիֆաաթ ալ-Ասադը, 1980-ականներին զբաղեցրել է Սիրիայի փոխնախագահի պաշտոնը։ 1984 թվականին, եղբորը տապալելու անհաջող փորձից հետո, նա փախել է Եվրոպա։ Այնտեղ նա ապրել է Ֆրանսիայում, Մեծ Բրիտանիայում և Իսպանիայում։ Ավելի քան 35 տարի անց՝ 2021 թվականին, Ռիֆաաթը վերադարձել է Սիրիա՝ խուսափելու բանտարկությունից՝ սիրիական պետությունից անօրինական կերպով դուրս բերված միջոցներով ֆրանսիական անշարժ գույք գնելու համար։ Ըստ լրատվամիջոցների հաղորդագրությունների, Ասադի ռեժիմի տապալումից հետո նա փորձել է լքել երկիրը ռուսական ավիաբազայի միջոցով, բայց մուտքը մերժվել է։ Նա, ի վերջո, տեղափոխվել է Լիբանան։ Ռիֆաաթ ալ-Ասադը մահացել է 2026 թվականի հունվարին՝ 88 տարեկան հասակում։
Ռիֆաաթ ալ-Ասադը նաև հայտնի էր որպես «Համայի մսագործ»՝ քաղաքում 1982 թվականի ապստամբության դաժան ճնշման պատճառով։ Գնահատականները տարբեր են՝ մեկ ամսից մի փոքր պակաս ժամանակահատվածում սպանվել է 10,000-ից մինչև 40,000 մարդ։