ԱԲ–ն կփոխի համաշխարհային տնտեսությունը և նոր հնարավորություններ կբացի Հայաստանի համար․ Աճեմօղլու

ԵՐԵՎԱՆ, 26 հունիսի․/ԱՌԿԱ/․ Արհեստական բանականությունը կդառնա համաշխարհային տնտեսությունը տրանսֆորմացիայի ենթարկող առանցքային ուժերից մեկը, իսկ թվային տրանսֆորմացիան նոր հնարավորություններ է ստեղծում Հայաստանի համար, կարծում է տնտեսագիտության ոլորտում Նոբելյան մրցանակի դափնեկիր Տարոն Աճեմօղլուն:

«Ակնհայտ է, որ ԱԲ-ն դառնալու է տրանսֆորմացնող ուժ, և հետևանքները կարող են լինել ինչպես շատ դրական, այնպես էլ շատ բացասական: Բայց այսօր ոչ ոք հստակ չգիտի, թե հատկապես ինչպիսին են դրանք լինելու», — ասել է Աճեմօղլուն՝ պատասխանելով «ԱՌԿԱ» գործակալության հարցին Ալմաթիում ԵԱԶԲ-ի 20-ամյակին նվիրված ֆորումի շրջանակում:

Նրա խոսքով՝ արհեստական բանականությունն արդեն սկսում է ազդել զբաղվածության վրա արդյունաբերական զարգացած երկրներում, իսկ ապագայում կփոխի աշխատանքի գլոբալ բաժանումը և լուրջ ազդեցություն կունենա կրթական համակարգի վրա:

«Մեզ անհրաժեշտ է շատ ավելի արագ հարմարվել ԱԲ-ի դարաշրջանին՝ ինչպես կրթության ոլորտում, այնպես էլ այն հարցում, թե ինչպես ենք կազմակերպում մեր կյանքը», — հայտարարել է տնտեսագետը։

Խոսելով Հայաստանի հեռանկարների մասին՝ Աճեմօղլուն նշել է, որ երկիրն ունի այլ մրցակցային առավելություններ, քան տարածաշրջանի պետությունների մեծ մասը։

«Հայաստանը մեծապես տարբերվում է Կենտրոնական Ասիայի մնացած երկրներից, քանի որ չունի բնական ռեսուրսներ, ուստի նրա համեմատական առավելությունն այլ է: Կարծում եմ, որ թվային տրանսֆորմացիան Հայաստանի համար նոր հնարավորություններ է ստեղծում», — ասել է նա։

Միևնույն ժամանակ, տնտեսագետի խոսքով, տնտեսության փոքր ծավալները, սահմանափակ ներքին շուկան և իրացման բնական շուկաներից մեկուսացումը մնում են լուրջ մարտահրավերներ երկրի համար։

Խոսելով համաշխարհային տնտեսության մասին՝ Աճեմօղլուն նշել է, որ աշխարհաքաղաքականությունը և արհեստական բանականությունը փոխում են գոյություն ունեցող տնտեսական հավասարակշռությունները։ Նրա խոսքով՝ զարգացող երկրների մի մասը կարող է բախվել լրացուցիչ դժվարությունների, մինչդեռ մյուսները կկարողանան օգտագործել ԱԲ-ի զարգացումը սեփական զարգացումն արագացնելու համար։