Նախարարն ընդգծել է, որ այդ արտադրանքը համապատասխանում է ամենաբարձր չափանիշներին
ԵՐԵՎԱՆ, 12 հունիսի․/ԱՌԿԱ/․ Էկոնոմիկայի նախարար Գևորգ Պապոյանը բացառել է հայկական արտադրանքի արտահանման հետ կապված որևէ խնդրի առկայությունը։
Նա նշել է, որ գործող ծրագրերի շրջանակում այժմ արդեն իրականացվում է հայրենական արտադրանքի արտահանում դեպի Հունաստան, Լեհաստան, Ուկրաինա, Բելառուս, Ռումինիա, Ղազախստան, Ուզբեկստան, ԱՄԷ։
«Ջերմոցային տնտեսություններում և ինտենսիվ այգիներում աճեցված ողջ արտադրանքը կարտահանվի»,- նշել է Պապոյանը 2025 թվականի ՀՀ պետական բյուջեի կատարողականի նախնական քննարկումների ժամանակ։
Նախարարն ընդգծել է, որ այդ արտադրանքը համապատասխանում է ամենաբարձր չափանիշներին։
«Հայաստանի ինտենսիվ այգիներում արտադրված արտադրանքի որակը որևէ կերպ չի զիջում Իսպանիայում, Իտալիայում, Գերմանիայում կամ Լեհաստանում արտադրված նույն արտադրանքի որակին»,- ասել է Պապոյանը։
Պատասխանելով Հայաստանից ՌԴ արտադրանքի մատակարարումների սահմանափակումների հետ կապված խնդիրների լուծման մասին հարցին՝ Պապոյանը հայտնել է, որ հունիս-հուլիս ամիսներին նախատեսված են իր մի շարք այցերը Ռուսաստան՝ տարբեր միջոցառումների մասնակցելու նպատակով, որտեղ հանդիպումներ կունենա երկու տարբեր գործընկերների հետ։
«Կքննարկվեն բոլոր այդ հարցերը, մեր կապերը չեն կասեցվել։ Հայաստանը սուվերեն, ժողովրդավարական և անկախ պետություն է, մենք միշտ մեծ հարգանքով ենք վերաբերվում մեր գործընկերներին, և հետևաբար, այդ հարգանքի մթնոլորտում քննարկում ենք բոլոր հարցերը։ Կարծում եմ, որ այդ հարցերը նույնպես կլուծվեն», – ասել է Պապոյանը՝ հավելով, որ դրանք այնպիսի հարցեր չեն, որոնք կարող են լարվածություն ստեղծել։
Հայաստանից ՌԴ արտադրանքի մատակարարումների սահմանափակումների մասին
Ռոսսելխոզնադզորը ժամանակավոր սահմանափակումներ է մտցրել Հայաստանից մի շարք արտադրանքի ներմուծման վրա՝ որպես պատճառ նշելով «ԵԱՏՄ և Ռուսաստանի ֆիտոսանիտարական պահանջների հաճախակի դարձած խախտումները»։ Սահմանափակումները մայիսի 22-ից անդրադարձել են ծաղկային և պարենային արտադրանքի վրա, մայիսի 30-ից՝ թարմ լոլիկի, վարունգի, պղպեղի, կանաչեղենի և ելակի վրա, հունիսի 2-ից՝ թարմ խաղողի և կորիզավոր պտուղների (բալ, կեռաս, ծիրան, սալոր, դեղձ և նեկտարին), հունիսի 3-ից՝ հնդավոր մշակաբույսերի պտուղների, սմբուկի, կարտոֆիլի և չորացրած մրգերի վրա։
Ռոսսելխոզնադզորում նաև հայտարարել են, որ հունիսի 2-ից Հայաստանը պետք է դադարեցնի կենդանի ձկան և ձկնամթերքի անասնաբուժական սերտիֆիկացումը դեպի ռուսաստանյան ստացողներ՝ հայկական բոլոր ընկերությունների համար, բացառությամբ տեսչական ստուգում անցած երկու ձեռնարկությունների։
Բացի այդ, Ռոսպոտրեբնադզորը կասեցրել է Հայաստանից «Ջերմուկ» հանքային ջրի բոլոր խմբաքանակների, ինչպես նաև հայկական երեք արտադրողների գինու և կոնյակի ներմուծումն ու շրջանառությունը Ռուսաստանում։
«Ռոսսելխոզնադզորում» հայտարարել են նաև, որ 2026 թվականի հունիսի 12-ից նախատեսում են սահմանափակել Հայաստանի ծագում ունեցող և այնտեղից առաքվող ողջ կարանտինային արտադրանքի ներմուծումը, ինչպես նաև Ռուսաստանի տարածքով տարանցիկ դեպի ԵԱՏՄ անդամ պետություններ։