ԲՀԿ խոսնակ Իվետա Մուկուչյանն արձագանքել է վարչապետ Նիկոլ Փաշինյանի հնչեցրած հայտարարություններին՝ նշելով, որ ընտրությունների արդյունքների վիճարկման և քաղաքացիների քվեների պաշտպանության գործընթացի փոխարեն վարչապետը հանրային օրակարգ է բերում «անհասկանալի պիտակավորումներ և գնահատականներ»։ Մուկուչյանը շեշտել է, որ ԲՀԿ-ի միջազգային կապերը երբևէ չեն թաքցվել և հրապարակային են եղել, ու հարցադրել է, թե իր խոսքում կամ կուսակցության գործունեության մեջ հատկապես ինչն է ենթակա հերքման կամ մեկնաբանման։
Այն ժամանակ, երբ ԲՀԿ-ն և այլ քաղաքական ուժեր զբաղված են ընտրությունների արդյունքների վիճարկման, վերահաշվարկների և յուրաքանչյուր քաղաքացու քվեի պաշտպանման գործընթացներով՝ փորձելով վերականգնել արդարությունը, երկրի վարչապետը հանրային օրակարգ է բերում անհասկանալի պիտակավորումներ և գնահատականներ։
Ի վերջո, ի՞նչն է պետք հերքել։
Ստոյկա տալու վերաբերյալ արտահայտությո՞ւնը, իշխանության հետ գործարքի գնալու մասին խոսակցությո՞ւնը, որը ինչ որ մեկը շրջանառության մեջ էր նախօրեին դրել ու ես արդեն հերքել եմ, բայց ասօր արդեն հասել է վարչապետի բրիֆինգի ժամանակ քննարկմանը։ ԲՀԿ նախագահ Գագիկ Ծառուկյանի արտաքին աշխարհի հետ ունեցած կապե՞րը, որոնց մասին ամբողջ աշխարհն է տեղյակ։ Այո՛, մենք ունենք միջազգային լայն և բաց համագործակցություն, և երբևէ չենք թաքցրել դա։ ՌԴ Եդինայա Ռոսիա կուսակցության հետ մեր գործընկերային հարաբերությունները, պաշտոնական հանդիպումները և փոխադարձ այցերը բազմիցս հրապարակայնորեն ներկայացվել են։ ԲՀԿ-ն հանդիսանում է Եվրոպայի պահպանողականների և ռեֆորմիստների ընտանիքի անդամ՝ իրականացնելով տարբեր ծրագրեր և փոխադարձ այցեր։ Շատ լավ հարաբերություններ ունենք արաբական աշխարհի մի շարք քաղաքական, հասարակական և գործարար շրջանակների հետ, ինչի մասին տեղյակ են բոլորը։ ԱՄՆ տարբեր ազդեցիկ շրջանակների հետ ունենք գործընկերային կապեր և համագործակցության ծրագրեր, որոնց մասին ևս հրապարակային խոսել ենք։
Հիմա ի վերջո ի՞նչը հերքեմ կամ մեկնաբանեմ»,- գրել է Տոնոյանը։
Հիշեցնենք, որ ՀՀ վարչապետ Նիկոլ Փաշինյանը՝ անդրադառնալով իր և Ծառուկյանի միջև հնարավոր գործարքի վերաբերյալ լուրերին ասել էր․ «Ո՞վ ո՞ւմ… Գագիկ Ծառուկյանին գործարք առաջարկե՞նք: Ծնկաչոք այդ գործարքին ընդառաջ կգար: Այսինքն՝ Գագիկ Ծառուկյանին ամբողջ կյանքում, բացի գործարքից, ոչ ոք Հայաստանում իրեն գործ առաջարկող չի եղել: Դրա համար որբի նման ընկել է աշխարհի տարբեր տեղերում, գործարք է փնտրել, գտել, հետո պարզվել է՝ ընդամենը իրեն հավաքագրել են, ինքը դրանից տեղյակ էլ չի: Գագիկ Ծառուկյանը «ստոյկա» կտա, որ ես գործարք առաջարկեմ իրեն. այդ ինչի՞ մասին է խոսքը»։