Եվրոպական արբանյակային ստարտափները ներդրողների կողմից հետաքրքրության աննախադեպ աճ են ապրում։ Ինչպես հայտնում է Bloomberg-ը, դրա հիմնական խթանը դարձել են Ուկրաինայում և Մերձավոր Արևելքում ընթացող հակամարտությունները։
Այս շուկայում գլխավոր խաղացողներից մեկը ֆիննական Iceye ստարտափն է։ Ընկերությունը զբաղվում է Երկրի հեռահար դիտարկմամբ և կարող է տվյալներ հավաքել օրվա ցանկացած ժամի ու ցանկացած եղանակային պայմաններում։ Ներկայում Iceye-ն պայմանագրեր ունի Գերմանիայի կառավարության, ինչպես նաև Ֆինլանդիայի, Շվեդիայի, Լեհաստանի, Պորտուգալիայի, Հունաստանի և Նիդեռլանդների պաշտպանական գերատեսչությունների հետ։
Ընկերությունն ունի ավելի քան 70 սինթետիկ ապերտուրայով ռադարային արբանյակներից բաղկացած խումբ։ Այս սարքերը կարող են բարձր լուծաչափով պատկերներ ստանալ նույնիսկ ամպերի, ծխի միջով և լիակատար մթության պայմաններում։ Տեխնոլոգիան հատկապես պահանջված է եղել Ուկրաինայում, որտեղ Iceye-ի տվյալների միջոցով հետևել են ռազմական տեղաշարժերին։ Այժմ ընկերությունը մոնիթորինգ է իրականացնում նաև Պարսից ծոցի տարածաշրջանում։
Ընդամենը վեց ամսում Iceye-ի գնահատականն աճել է չորս անգամ՝ հասնելով 10 մլրդ եվրոյի (12 մլրդ դոլար)։ Ստարտափը ներգրավել է 450 մլն եվրոյի նոր ներդրումներ՝ ֆիննական խոշորագույն հիմնադրամներից, Nokia Oyj-ից և Qatar Investment Authority-ից։ Նյութում նշվում է, որ Ֆինլանդիայի պետության մասնաբաժինն ընկերությունում այժմ կազմում է 12%։
Այս ֆոնին եվրոպական մյուս արբանյակային նախագծերը նույնպես ակտիվորեն կապիտալ են ներգրավում։ Գերմանական Isar Aerospace SE-ն ավարտել է 270 մլն եվրոյի ներդրումային փուլ, իսկ լեհական Creotech Instruments SA-ն ներգրավել է 481 մլն զլոտի (114 մլն դոլար)։
Molten Ventures Plc-ի գլխավոր տնօրեն Բեն Ուիլկինսոնը, որը Iceye-ի վաղ ներդրողներից է, այս ակտիվությունը կապում է Ուկրաինայի և Իրանի շուրջ հակամարտությունների պայմաններում արբանյակային տվյալների կարևորության աճի հետ։ Նրա խոսքով՝ ժամանակակից ռազմական գործողությունների բնույթը փոխվել է, և անօդաչու համակարգերի լայն կիրառման պայմաններում «անհնար է անտեսել, թե ինչ է անում յուրաքանչյուր կողմը»։