ՆԱՏՕ-ն աշխատում է Բալթիկ ծովի ամենամեծ կղզի Գոտլանդը ամրացնելու ուղղությամբ՝ Ռուսաստանին հակազդելու համար, հաղորդել է Politico-ն։
Գտնվելով Բալթիկ ծովի կենտրոնում՝ Գոտլանդը Կալինինգրադից ընդամենը 300 կիլոմետր հեռավորության վրա է։ Հոդվածում նշվում է, որ ռուսական ագրեսիայի, հիբրիդային հարձակումների և եվրոպական անվտանգության հարցում ԱՄՆ-ի տատանումների վերաբերյալ աճող մտահոգությունների ֆոնին Շվեդիան և նրա ՆԱՏՕ-ի դաշնակիցները շտապում են Գոտլանդը վերածել ռազմական բազայի։
Անցյալ շաբաթ Շվեդիան ավարտեց իր առաջին ՆԱՏՕ-ի կողմից համակարգված զորավարժությունները կղզում՝ 2024 թվականին դաշինքին միանալուց ի վեր։ 13 երկրներից մոտ 18,000 զինվորականներ մարզվել են Գոտլանդի փոշոտ հարթավայրերում՝ պատրաստվելով Ռուսաստանի կողմից հնարավոր հարձակմանը։
«Հաշվի առնելով ժամանակակից [զենքի] համակարգերի հեռահարությունն ու տեղակայումը, եթե դուք վերահսկում եք Գոտլանդը, կարող եք վերահսկել Բալթիկ ծովում տեղի ունեցողի մեծ մասը», – հրատարակությանը ասել է կառավարության կողմից աջակցվող Շվեդիայի պաշտպանության հետազոտությունների գործակալության փոխտնօրեն Նիկլաս Գրանհոլմը։
Կղզին ստացել է «անխորտակելի ավիակիր» մականունը՝ տարածաշրջանում օդային գործողությունների համար կարևոր մեկնարկային կետ լինելու իր դերի համար։ Այնտեղից թռչող կործանիչները, ըստ որոշ տեղեկությունների, կարող են «րոպեների ընթացքում» հասնել Բալթյան ցանկացած մայրաքաղաք։