Արհեստական բանականությունը կարող է առաջիկա տասնամյակում համաշխարհային տնտեսական աճն ավելացնել տարեկան մոտ 1%-ով՝ ներկայիս մոտ 3.5%-ից հասցնելով 4.5%-ի, քանի որ տեխնոլոգիան խթանում է արտադրողականության աճը տարբեր ոլորտներում։ Այս եզրակացությունը ներկայացված է Bank of America-ի վերլուծական զեկույցում։
Զեկույցում նշվում է, որ արհեստական բանականությունն արդեն ապահովում է արտադրողականության զգալի աճ առանձին առաջադրանքների մակարդակում․ ծրագրային ապահովման մշակման ոլորտում արտադրողականությունն աճել է 55%-ով, իսկ տեքստերի ստեղծման հետ կապված առաջադրանքներում՝ մոտ 40%-ով։
Չնայած ԱԲ-ի հաջողություններին՝ դրա ազդեցությունը ընդհանուր տնտեսական արտադրողականության վրա դեռևս սահմանափակ է․ ամբողջ տնտեսության մասշտաբով արտադրողականությունն աճում է տարեկան ընդամենը մոտ 0.1%-ով՝ դանդաղ ներդրման, աշխատուժի վերապատրաստման անհրաժեշտության և կազմակերպչական սահմանափակումների պատճառով։
ԱԲ-ի կիրառումը շարունակում է ընդլայնվել գլոբալ մակարդակով․ 2025 թվականին այն օգտագործում է տարբեր ոլորտների ընկերությունների 64%-ը։ Ներդրման մակարդակով առաջատարն է Հյուսիսային Ամերիկան, որտեղ ընկերությունների 70%-ը ակտիվորեն կիրառում է ԱԲ, մինչդեռ Եվրոպայում, Մերձավոր Արևելքում և Աֆրիկայում այդ ցուցանիշը կազմում է 65%, իսկ Ասիա-Խաղաղօվկիանոսյան տարածաշրջանում՝ 63%։
Զեկույցում նշվում է, որ առանձին ընկերությունների մակարդակում արտադրողականության բարձր աճի և մակրոտնտեսական ավելի թույլ ցուցանիշների միջև առկա ներկայիս տարբերությունը պայմանավորված է մի շարք դժվարություններով՝ գործող աշխատանքային գործընթացների մեջ ինտեգրմամբ, որակյալ կադրերի պակասով, կարգավորող խոչընդոտներով և ենթակառուցվածքային սահմանափակումներով։
Այս գործոնները դանդաղեցնում են ԱԲ-ի շնորհիվ ձեռք բերված արդյունավետության վերափոխումն ավելի լայն տնտեսական արդյունքի։
Ժամանակի ընթացքում ԱԲ-ն կարող է ունենալ ավելի նշանակալի ազդեցություն, քան նախորդ տեխնոլոգիական առաջընթացները, քանի որ այն հնարավոր է կիրառել տնտեսական գործունեության շատ ավելի լայն շրջանակում։ Մոդելների կատարելագործման և ծախսերի նվազման պայմաններում արտադրողականության աճը կարող է տասն անգամ գերազանցել ներկայիս գնահատականները։
Զեկույցում նաև ընդգծվում է ԱԲ-ի ներուժը՝ նորարարությունների գործընթացի արտադրողականությունը բարձրացնելու հարցում՝ գաղափարների գեներացման և հետազոտությունների արագացման միջոցով։
Արհեստական բանականությունը կարող է տնտեսություններին դուրս բերել արտադրողականության միանվագ աճի սահմաններից և ապահովել կայուն երկարաժամկետ աճ։
Ակնկալվում է, որ ԱԲ-ի ներդրման ավելի բարձր ներուժ ունեցող երկրները՝ առաջին հերթին ԱՄՆ-ն ու Չինաստանը, այս առավելությունները կստանան ավելի շուտ, քան Եվրոպան և զարգացող շատ շուկաներ։
Ներդրման տեմպերի, կարգավորող մոտեցումների և կազմակերպչական պատրաստվածության տարբերությունները կարող են տարածաշրջանների միջև ձևավորել արտադրողականության կայուն տարբերություններ։
Զեկույցում նաև նշվում է, որ ԱԲ-ի ավելի արագ ներդրումը կարող է նպաստել առաջատար տնտեսություններում չեզոք տոկոսադրույքների աճին, քանի որ ավելի բարձր արտադրողականությունը խթանում է ներդրումային պահանջարկը։
Այն երկրները, որոնք հետ են մնում ԱԲ-ի ներդրման տեմպերով, հավանաբար կբախվեն երկարաժամկետ տոկոսադրույքների աննշան աճի կամ ընդհանրապես չեն զգա այն։
Տեխնոլոգիական հրապարակումներն իրականացվում են Իդրամի աջակցությամբ։