Սիրելի՛ շրջանավարտներ,
Այսօր հնչում է դպրոցական վերջին զանգը՝ իր մեջ ամփոփելով անհոգ մանկության տարիներն ու պատանեկան վառ հիշողությունները։ Այն միաժամանակ ազդարարում է մի նոր՝ ավելի հասուն, ինքնուրույն ու պատասխանատու կյանքի սկիզբը։ Թող ձեր յուրաքանչյուր քայլ լինի հաստատուն, միտքը՝ առաջադեմ, իսկ ճանապարհը՝ լի նորանոր ձեռքբերումներով։ Այն գիտելիքներն ու մարդկային արժեքները, որ ստացել եք դպրոցում, ձեր կյանքի ամենահուսալի հենարանն են։ Քայլե՛ք դեպի ապագան համարձակ ու անկոտրում կամքով։ Մաղթում եմ, որ ձեր մասնագիտական հաջողություններին զուգահեռ միշտ բարձր պահեք հայրենասեր, պատասխանատու և մարդասեր քաղաքացու կոչումը՝ դառնալով մեր հասարակության առաջամարտիկն ու հպարտությունը։ Անցնող տարիներին հանրապետական ու միջազգային օլիմպիադաներում, ինչպես նաև տարբեր ստեղծագործական ու սպորտային մրցույթներում ձեր արձանագրած հաղթանակները վաղուց արդեն դուրս են եկել անձնական հաջողության սահմաններից. դրանք մեր ողջ համայնքի ու հայրենիքի հպարտությունն են։ Դուք գործով եք ապացուցում, որ գիտելիքն ամենահզոր ուժն է, իսկ նպատակասլացությունն ու հետևողական աշխատանքը միշտ պսակվում են արժանի պտուղներով։
Այս փայլուն ձեռքբերումները, սակայն, անհնարին կլինեին առանց մեր նվիրյալ ուսուցիչների անձնուրաց ջանքերի։
Հարգարժա՛ն մանկավարժներ, խորին երախտագիտություն և խոնարհում ձեզ։ Դուք պարզապես գիտելիք չեք փոխանցում. դուք կերտում եք անհատներ, ձևավորում ամուր արժեհամակարգ ու կայացած քաղաքացիներ։ Այսօր դուք ևս մեկ սերունդ եք ճանապարհում դեպի մեծ կյանք՝ նրանց հոգիներում հավերժ սերմանելով սեր դեպի ուսումը, հայրենիքն ու մարդկային վսեմ արժեքները։ Ձեր վեհ աշխատանքն անգնահատելի է։
Սիրելի՛ շրջանավարտներ, հիշե՛ք՝ լինի դա տեխնոլոգիաների, գիտության, արվեստի, թե տնտեսության ոլորտում, բարձրակարգ մասնագետների դերն առանցքային է երկրի առաջընթացի համար։ Հենց դուք եք այն շարժիչ ուժը, որը պետք է խթանի մեր երկրի զարգացումը, բերի նորարարություններ ու նպաստի հասարակության բարգավաճմանը։ Ձեր ապագա աշխատանքն ու մասնագիտական վերելքները ոչ միայն անձնական հաջողության, այլև հանրային բարօրության գրավականն են լինելու։ Այս հիշարժան ու տոնական օրվա առթիվ սրտանց շնորհավորում եմ ձեզ։ Մաղթում եմ լուսավոր ապագա, անսպառ եռանդ, անկոտրում հավատ սեփական ուժերի հանդեպ և բարի՛ երթ դեպի ձեր նվիրական երազանքները։