Ռուսաստանի նախագահ Վլադիմիր Պուտինը Չինաստանի նախագահ Սի Ծինփինի հետ կիսվել է Իրանի հարստացված ուրանն ի պահ վերցնելու ՌԴ-ի գաղափարով: Այս մասին լրագրողների հետ զրույցում ասել է Կրեմլի խոսնակ Դմիտրի Պեսկովը։
Նա, սակայն, չի նշել, թե ինչպես է դրան արձագանքել Չինաստանի նախագահիը, քանի որ զրույցը փակ է եղել:
ՌԴ նախագահի մամուլի քարտուղարը նաև նշել է, որ Վաշինգտոնը դեռևս չի ընդունում Մոսկվայի առաջարկները՝ իրանական հարստացված ուրանը Ռուսաստանում պահելու համար դուրս բերելու վերաբերյալ:
«Այս թեման պետք է ընդունեն Իրանում և Ամերիկայում, եթե դա պահանջված առաջարկ է։ Վաշինգտոնը դա դեռ չի ընդունում»,-պարզաբանել է Պեսկովը։
Նա նաև հայտնել է, որ ՉԺՀ առաջնորդը Պուտինի հետ կիսվել է ԱՄՆ նախագահ Դոնալդ Թրամփի՝ վերջերս Չինաստան կատարած այցի մասին տեղեկատվությամբ:
Հիշեցնենք, որ ավելի վաղ ՌԴ ԱԳ նախարար Սերգեյ Լավրովը հայտարարել էր, որ Մոսկվան պատրաստ է իրանական հարստացված ուրանի հարցի լուծման գործում ստանձնել այնպիսի դերակատարություն, որ դա առավելագույնս ընդունելի լինի Իրանի համար: