ՀՀ ԱԺ տնտեսական հարցերի մշտական հանձնաժողովի մայիսի 19-ի նիստում քննարկվել և ի գիտություն է ընդունվել Հանրային ծառայությունները կարգավորող հանձնաժողովի (ՀԾԿՀ) 2025 թվականի գործունեության մասին հաղորդումը: Այս մասին տեղեկացրել են ԱԺ մամուլի ծառայությունից:
Հանձնաժողովի նախագահ Մեսրոպ Մեսրոպյանը, ներկայացնելով հաշվետվությունը, նշել է, որ 2025 թվականն առանձնացել է օրենսդրական լրամշակումներով և շուկայի կառուցվածքային զարգացմամբ:
Օրենսդրական բարեփոխումներ
Հաշվետու տարում ՀԾԿՀ-ն ներկայացրել է իր դիտողություններն ու առաջարկությունները Ամերիկյան միջազգային զարգացման գործակալության (USAID) Հայաստանի էներգետիկ անվտանգության ծրագրի և Համաշխարհային բանկի (ՀԲ) կողմից մշակված մի շարք օրենքների լրամշակված նախագծերի վերաբերյալ, այդ թվում՝
-
«Էլեկտրաէներգետիկայի մասին»
-
«Վերականգնվող էներգետիկայի և էներգախնայողության մասին»
Լրամշակվել են նաև մեծածախ և մանրածախ շուկաների առևտրային կանոնները, հաղորդման և բաշխման ցանցային կանոնները, գազամատակարարման համակարգում սակագների հաշվարկման մեթոդիկաները, լիցենզավորման կարգը և կարգավորվող ընկերությունների գնումների նկատմամբ պահանջները:
Էլեկտրաէներգիայի շուկայի ազատականացում
Ըստ հաղորդման՝ մեկնարկից չորս տարի անց էլեկտրաէներգիայի մեծածախ շուկայի ազատական հատվածի սպառումն աճի կայուն դինամիկա է արձանագրել՝ կազմելով ներքին ընդհանուր սպառման.
-
2022 թ.՝ 5.3%
-
2023 թ.՝ 20.1%
-
2024 թ.՝ 27.8%
-
2025 թ.՝ 33.2%
Միայն 2025 թվականին 6-10 կՎ լարման սպառողների շուրջ 474.5 միլիոն կՎտժ սպառման ծավալ է մուտք գործել ազատականացված շուկա:
Սակագների կայունություն
2025 թվականին վերանայվել են բնական գազի փոխադրման, գազամատակարարման համակարգի օպերատորի ծառայությունների և պահեստավորման սակագները, սակայն սպառողներին վաճառվող բնական գազի վերջնական սակագնի փոփոխության անհրաժեշտություն չի առաջացել: Հաշվետու տարում անփոփոխ են մնացել նաև էլեկտրաէներգիայի և խմելու ջրի սակագները:
Վերականգնվող էներգետիկայի ցուցանիշները (դրությամբ՝ 31.12.2025)
-
Փոքր ՀԷԿ-եր. Գործել է 191 կայան (403 ՄՎտ ընդհանուր հզորությամբ), կառուցման փուլում է գտնվել 20-ը (38 ՄՎտ հզորությամբ):
-
Արևային կայաններ. Գործել է 100 էլեկտրակայան (448 ՄՎտ հզորությամբ), կառուցման փուլում է եղել 42-ը (183 ՄՎտ հզորությամբ):
-
Ինքնավար արտադրողներ. Բաշխման ցանցին միացած սպառողների թիվը գերազանցել է 50 հազարը (ընդհանուր հզորությունը՝ 640 ՄՎտ, միջին ամսական աճը՝ 15–20 ՄՎտ):
Հեռահաղորդակցության ոլորտ
-
Շարժական կապ. Բաժանորդների թիվը կազմել է 4,151,192 (տարեկան աճը՝ 66,792):
-
Շարժական ինտերնետ. Լայնաշերտ ինտերնետի բաժանորդների թիվը հասել է 3,550,621-ի (աճը՝ 8.9%):
-
Ամրակցված կապ. Գործում է 202 լիցենզավորված օպերատոր (170-ը՝ մարզերում, 32-ը՝ Երևանում)։ Ամրակցված ինտերնետի բաժանորդների թիվն աճել է 3.5%-ով՝ կազմելով 624,985:
Դիմում-բողոքներ և Ֆինանսական ցուցանիշներ
ՀԾԿՀ-ն 2025 թվականին ստացել է 3460 դիմում-բողոք (1906 գրավոր, 1554 բանավոր):
Հանձնաժողովի տարեկան բյուջեն կազմել է 1 միլիարդ 190.2 միլիոն դրամ, որից փաստացի ծախսվել է 1 միլիարդ 102.7 միլիոն դրամ (88.5 միլիոն դրամը վերադարձվել է պետբյուջե): Միաժամանակ, կառույցի գործունեության արդյունքում պետական բյուջե է փոխանցվել 10.3 միլիարդ դրամ, որի կառուցվածքն ունի հետևյալ տեսքը.
-
9.7 միլիարդ դրամ՝ ռադիոհաճախականությունների օգտագործման և թույլտվությունների տրամադրման մուտքեր:
-
380.23 միլիոն դրամ՝ լիցենզիայի տուրքեր:
-
227.4 միլիոն դրամ՝ իրավական ակտերի խախտումների համար տնտեսվարողների վճարած տուգանքներ: