Քրիստոնեա-ժողովրդավարական կուսակցության վարչապետի թեկնածու Լևոն Շիրինյանը նախընտրական ուղերձ է հրապարակել՝ ընդգծելով կուսակցության նվիրվածությունը քրիստոնեական արժեհամակարգին, ազգային ինքնությանը և պետականությանը։ «Արմենպրես»-ի հաղորդմամբ՝ Շիրինյանն այս մասին ասել է «Ֆեյսբուք»-ում հրապարակված տեսանյութում։
Շիրինյանը նշել է, որ իր ուղերձը հնչեցնում է Խոր Վիրապից, քանի որ այստեղ է տեղի ունեցել Հայաստանի պատմության կարևորագույն իրադարձություններից մեկը՝ քրիստոնեությունը որպես պետական կրոն ընդունելու գործընթացը։
«Մենք հավաստում ենք Քրիստոնեա-ժողովրդավարական կուսակցության նվիրվածությունը քրիստոնեական արժեհամակարգին, մեր ժողովրդի բարոյական կերպարին, ինքնությանը և, անշուշտ, պետականության անշեջ պատկերին»,- հայտարարել է Շիրինյանը։
Նրա խոսքով՝ կուսակցությունը ընտրություններին մասնակցում է ազգային և քրիստոնեական արժեքների պաշտպանության օրակարգով։
«Մենք գալիս ենք պայքարելու մեր ազգային արժեքների համար, քրիստոնեական արժեհամակարգի համար»,- նշել է նա։
Շիրինյանը նաև հայտարարել է, որ կուսակցությունը հանդես է գալիս գիտաարդյունաբերական և տեխնոլոգիական Հայաստանի գաղափարով։
«Մենք գալիս ենք հաստատելու գիտաարդյունաբերական Հայաստանի կոնցեպցիան, տեխնոլոգիական թռիչք պահանջող նվաճումների Հայաստանի կերպարը»,- ասել է նա։
Նրա խոսքով՝ կուսակցության օրակարգում կարևոր տեղ ունեն նաև գյուղատնտեսության և էկոհամակարգի վերականգնման հարցերը։
Շիրինյանը նշել է, որ կուսակցության հիմնական կարգախոսն է՝ «Անվտանգություն, ազատություն և զարգացում»։
Քրիստոնեա-ժողովրդավարական կուսակցությունը հունիսի 7-ին Հայաստանում անցկացվելիք խորհրդարանական ընտրություններին մասնակցում է 12 համարի ներքո։ Կուսակցությունը 82 հոգանոց ցուցակ է ներկայացրել։