ԱՄՆ նախագահ Դոնալդ Թրամփը դժգոհ է Իրանի հետ ձգձգվող հակամարտությունից և ցանկանում է հնարավորինս արագ անցնել այլ առաջնահերթությունների։ Այդ մասին գրում է The Atlantic-ը։
Պարբերականի տեղեկություններով՝ Թրամփը «ձանձրացել է» երկարաձգվող ճգնաժամից և հիասթափված է, քանի որ հակամարտությունը տևում է շատ ավելի երկար, քան ինքն ակնկալում էր։ Բացի այդ, իրավիճակում դեռևս չի երևում հստակ հաղթանակ կամ արագ հանգուցալուծում։
Աղբյուրների փոխանցմամբ՝ Թրամփը ցանկանում է կենտրոնանալ ներքին քաղաքականության, Չինաստանի հետ առևտրային բանակցությունների և այլ կարևոր ուղղությունների վրա։ Սակայն Իրանը շարունակում է դիմակայել բանակցային ճնշմանը, ինչի հետևանքով հակամարտությունը շարունակում է ձգձգվել։
The Atlantic-ը նշում է, որ ստեղծված իրավիճակը լրացուցիչ լարվածություն է առաջացնում Վաշինգտոնի քաղաքական օրակարգում, քանի որ Սպիտակ տան ուշադրությունը դեռևս կենտրոնացած է Մերձավոր Արևելքի զարգացումների վրա։