Տեխնոլոգիաները զարգացել են շատ ավելի արագ, քան դրանցից բխող ռիսկերն ու հնարավորությունները կառավարելու մեր կարողությունը: Արհեստական բանականությունն այլևս ֆուտուրիստական երազանք չէ, այլ ներկայի ուժ: Այդ մասին «Երևանյան երկխոսություն» 3-րդ միջազգային համաժողովի բացման արարողությանն ասել է ԱԳ նախարար Արարատ Միրզոյանը:
«Մենք, բնականաբար, կանխատեսում էինք, որ այն կվերափոխի արդյունաբերություններ, կվերացնի որոշ մասնագիտություններ և կփոխի աշխատանքի էությունը, բայց դրանից զատ՝ ԱԲ-ն դարձել է նաև մանիպուլյացիայի ուժեղ գործիք՝ արդյունաբերական ծավալներով գեներացնելով ապատեղեկատվություն, ստեղծելով կեղծ իրականություններ և վիրաբուժական ճշգրտությամբ թիրախավորելով ժողովրդավարական հասարակությունները»,- նշել է Միրզոյանը:
Նա ընդգծել է, որ համաշխարհային շուկան այլևս կայուն չէ, իսկ վերջին զարգացումներով խորապես հասանելի է այն համոզմունքը, որ բաց առևտուրը օգուտ է բերում բոլորին: «Մայրցամաքները միավորող մատակարարման շղթաները հեշտությամբ խզվում են: Էներգակիրների գների տատանումները կարող են մեկ գիշերվա ընթացքում խաթարել ազգային տնտեսությունները:
Տնտեսական պատժամիջոցները դարձել են աշխարհաքաղաքական ճնշման առօրեական գործիք՝ առևտուրը վերածելով մարտադաշտի»,- ասել է ՀՀ ԱԳ նախարարը:
Դիտումների քանակ2