Այժմ մենք ունենք խաղաղություն Ադրբեջանի հետ: Արդեն երկու տարի է, ինչ որևէ մեկը չի տուժել Ադրբեջանի հետ փոխհրաձգության պատճառով, և սրանք աննախադեպ տարիներ են մեր անկախացումից ի վեր: Այդ մասին Եվրոպական քաղաքական համայնքի 8-րդ գագաթնաժողովի բացման ժամանակ ասաց վարչապետ Նիկոլ Փաշինյանը:
Ըստ վարչապետի՝ այժմ Հայաստանը սերտորեն աշխատում է Ադրբեջանի հետ, որպեսզի ամրապնդվի և ինստիտուցիոնալ դառնա երկու երկրների միջև խաղաղությունը:
«Սա առաջին անգամ է, երբ Ադրբեջանի նախագահը մասնակցում է միջոցառմանը, որը տեղի է ունենում Հայաստանում, թեպետ՝ հեռակապով, բայց հույս ունենք, որ հնարավորություն կունենամ այցելելու Ադրբեջան 2028 թվականին, երբ ԵՔՀ գագաթնաժողովն այնտեղ անցկացվի:
Իմիջիայլոց, Հայաստանն ու Ադրբեջանը փոխադարձաբար աջակցել են միմյանց թեկնածություներին՝ հյուրընկալելու այս գագաթնաժողովները»,- ասաց նա: