Չինաստանը մայիսից կվերականգնի բենզինի, դիզելային վառելիքի և ավիավառելիքի արտահանումը: Այս մասին հայտնում է Financial Times-ը՝ հղում անելով աղբյուրներին։
Նրանց խոսքով՝ խոշոր պետական նավթային ընկերությունները դիմումներ են ներկայացրել՝ հաջորդ ամսում վառելիքի արտահանման թույլտվություններ ստանալու համար։
ՉԺՀ ղեկավարությունը կարծում է, որ վառելիքի ներքին պահանջարկը կայուն է, և երկիրը կարող է վերականգնել արտահանումը:
Աղբյուրի խոսքով՝ Պեկինը ցանկանում է հիմնականում ավիավառելիք մատակարարել ասիական երկրներին, որոնց պաշարները վտանգավոր ցածր մակարդակի վրա են, ինչպես նաև որոշ ծավալներով բենզին և դիզելային վառելիք։
Չինաստանի իշխանությունները Մերձավոր Արևելքում հակամարտության սկզբում արգելել էին վառելիքի արտահանումը՝ ներքին շուկան պաշտպանելու նպատակով։
Kpler-ի տվյալներով՝ պատերազմից առաջ Չինաստանը օրական արտահանում էր գրեթե 800 հազար բարել վառելիքային նավթամթերք։ Ապրիլին այդ ցուցանիշը կրճատվել է մոտավորապես կրկնակի։
ՉԺՀ-ն աշխարհի խոշորագույն նավթի ներմուծողն է և դիզելային ու ավիավառելիքի խոշոր մատակարարը դեպի Ավստրալիա, Ճապոնիա, Վիետնամ, Բանգլադեշ և Ֆիլիպիններ։