Սուն թվականի դեկտեմբերի 25-ի նիստում ՀՀ կառավարությունը հաստատեց Մթնոլորտային օդի պետական մոնիտորինգի իրականացման, ստացված տվյալների հավաքման, վերլուծության, գնահատման և տեղեկատվության տրամադրման կարգը։
Ըստ ՀՀ կառավարության որոշման նախագծի՝ ներկայիս գործող ընթացակարգերում բացակայում է մթնոլորտային օդի որակի գնահատումն մարդու առողջության, ընդհանուր բնակչության, զգայուն բնակչությանը և խոցելի խմբերին առաջարկվող ձեռնարկվելիք նախազգուշական և կանխարգելիչ միջոցառումների վերաբերյալ։
Հանրությունն իրազեկված չէ մթնոլորտային օդի աղտոտվածության դեպքում նախազգուշական և կանխարգելիչ միջոցառումների վերաբերյալ, իրազեկված չէ, թե մթնոլորտային օդի աղտոտվածության որ մակարդակն ըստ օդի որակի ինդեքսի ինչ վնաս կարող է հասցնել մարդու առողջությանը։
Իրավականորեն կարգավորված չէ մթնոլորտային օդի աղտոտվածության գերնորմավորման դեպքում պետական գերատեսչությունների դերը հանրության իրազեկման շրջանակներում։
Նախագծով նախատեսվում է սահմանել․
- Մթնոլորտային օդի որակի մոնիտորինգի իրականացման ընթացակարգը
- Ստացված տվյալների հավաքման, վերլուծության և գնահատման ընթացակարգերը
- Վերլուծության և գնահատման արդյունքում ստացված տեղեկատվության հանրայնացման, հրապարակման և հանրությանը տրամադրման ընթացակարգերը
- Մթնոլորտային օդի որակի պետական մոնիտորինգ իրականացնում է միայն Շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ը և մթնոլորտային օդի որակի տվյալներ կարող է տրամադրել միայն ՊՈԱԿ-ը
- Օդի որակի ինդեքսի մասին դրույթ, ինչի շնորհիվ հասանելի և տեսանելի կդարձնի հանրությանը, զգայուն բնակչությանը և խոցելի խմբերի համար մթնոլորտային օդի որակի վերաբերյալ տեղեկատվությունը, մթնոլորտային օդի աղտոտվածության դեպքում հանրությանը, զգայուն բնակչությանը և խոցելի խմբերի համար հնարավոր նախանշանների և առաջարկվող կանխարգելիչ միջոցառումների վերաբերյալ
- Մթնոլորտային օդի աղտոտվածության դեպքում տեղեկացման և զգուշացման շեմերի գերազանցման դեպքում՝ պետական գերատեսչությունների կողմից ձեռնարկվելիք քայլերի և հանրությանը, զգայուն բնակչությանը և խոցելի խմբերի համար հնարավոր նախանշանների և առաջարկվող կանխարգելիչ միջոցառումների վերաբերյալ։
Նախագծով ուժի մեջ մտնելու ժամկետ է սահմանվել 2028 թվականի հունվարի 1-ը:
Միաժամանակ, հավանություն է տրվել ՀՀ և Ճապոնիայի միջև «Տնտեսական և սոցիալական զարգացում» դրամաշնորհի համաձայնագիրը հաստատելու վերաբերյալ նախագահի հրամանագրի նախագծի մասին կառավարության որոշման նախագծին։
Համաձայնագրով նախատեսվում է ՀՀ կառավարությանը տրամադրել 250.0 միլիոն ճապոնական յեն դրամաշնորհ (շուրջ 1.6 մլն ԱՄՆ դոլար)՝ Շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ի օդի որակի մոնիտորինգի կայանների համար սարքավորումներ ձեռք բերելու նպատակով։
Դրամաշնորհի շրջանակում նախատեսվում է արդիականացնել դիտացանցի 3 դիտակայան՝ ժամանակակից ավտոմատ չափում ապահովող (ճապոնական Horiba) սարքավորումներով։
Դեկտեմբեր 29, 2025 at 16:34