Քաղաքականություն
21.04.2026 | 23:04
A23a սառցաբեկորը, որը մինչև 2025 թվականի վերջը համարվում էր աշխարհում ամենամեծը, «ավարտում է իր պատմությունը», հաղորդում է Արկտիկայի և Անտարկտիկայի հետազոտական ինստիտուտը, գրում է Meduza-ն։
A23a սառցաբեկորը մասնատվել է փոքր կտորների՝ կորցնելով իր սկզբնական մակերեսի 99%-ը:
«Հունվարին սառցաբեկորի մակերեսը կազմում էր մոտավորապես 1300 քառակուսի կիլոմետր։ Ներկայում դրա մակերեսը կազմում է 50 քառակուսի կիլոմետրից պակաս»,- ասել է Արկտիկայի և Անտարկտիկայի հետազոտությունների ինստիտուտի սառույցի և հիդրոօդերևութաբանական տեղեկատվական կենտրոնի գլխավոր մասնագետ Պոլինա Սոլոշչուկը։
Նա նշել է, որ «A23a սառցաբեկորը ներկայում լողում է մաքուր ջրերի միջով և բառացիորեն կոտրվում է մեր աչքերի առաջ»:
Վերջին երեք ամիսների ընթացքում A23a-ն անցել է մոտավորապես 1000 կիլոմետր և հատել Հարավային և Ատլանտյան օվկիանոսների սահմանը։ Այն ներկայում լողում է 49-րդ հարավային զուգահեռականի մոտ։
«A23a սառցաբեկորի պատմությունն ավարտված է»,- իր Telegram ալիքում նշել է ինստիտուտը։
A23a սառցաբեկորը 1986 թվականին Անտարկտիդայի Ֆիլչների սառցադաշտից անջատվել է։ Ձևավորման պահին դրա մակերեսը կազմել է 4170 քառակուսի կիլոմետր։
2025 թվականի վերջին A23a-ի մակերեսը կրճատվել էր մինչև 1370 քառակուսի կիլոմետր, ինչի պատճառով այն կորցրել էր աշխարհի ամենամեծ սառցաբեկորի կարգավիճակը։
Թարգմանությունը՝ Էմմա Չոբանյանի