ՄԱԿ-ի Զարգացման ծրագրի «Կայուն համայնքներ» նախաձեռնության շրջանակում մեկնարկել է «NEXUS Կապան 2․ Ջերմատնային ձեռնարկատիրության կլաստերի ընդլայնում» ծրագիրը, որի նպատակն է զարգացնել Կապան համայնքում ջերմատնային տնտեսությունները և ամրապնդել գյուղ–քաղաք տնտեսական կապերը։
Ապրիլի 15-ին նախաձեռնությունը Կապանի բնակիչներին ներկայացրեց ՄԱԶԾ «Կայուն համայնքներ» ծրագրի փորձագետ Մխիթար Բալայանը, իսկ Կապան համայնքի ղեկավարի տեղակալ Մարատ Հարությունյանը պատասխանեց նրանց հարցերին։
Ծրագրի շրջանակում նախատեսվում է ընտրել մինչև 30 մասնակից, որոնք կանցնեն մասնագիտական և բիզնես ուսուցում։ Դասընթացները կներառեն գյուղատնտեսական հմտությունների զարգացում, շուկայի ուսումնասիրություն, ինչպես նաև գնագոյացման ու ֆինանսական պլանավորման հիմունքներ։
Ուսուցման փուլը հաջողությամբ ավարտած առավել պատրաստված և մոտիվացված մինչև 17 մասնակից կստանան հնարավորություն՝ համաֆինանսավորմամբ հիմնելու 300 քմ մակերեսով ժամանակակից ջերմատներ։
Նախաձեռնության նպատակն է՝ խթանել տեղական արտադրությունը և մարզային շուկան ապահովել թարմ գյուղմթերքով։
Հետաքրքրված անձինք կարող են դիմել մինչև ապրիլի 25-ը։
Ծրագրին մասնակցելու համար անհրաժեշտ է լրացնել դիմումի ձևը՝ կցելով համապատասխան փաստաթղթերը։
Իզա Ասծատրյան