Գերմանիան և Ուկրաինան ստորագրել են ռազմավարական գործընկերության և տարբեր ոլորտներում համագործակցության համաձայնագրեր: Փաստաթղթերը ստորագրվել են Գերմանիայի կանցլեր Ֆրիդրիխ Մերցի և Ուկրաինայի նախագահ Վլադիմիր Զելենսկիի կողմից՝ Բեռլինում դաշնային կանցլերի գրասենյակում երկու երկրների մի շարք գերատեսչությունների ղեկավարների մասնակցությամբ տեղի ունեցած միջկառավարական խորհրդակցությունների ժամանակ, գրում է DW-ն։
Մերցը նշել է, որ սա Գերմանիայի և Ուկրաինայի երկկողմ հարաբերությունները բարձրացնում է ռազմավարական գործընկերության մակարդակի: Նա հավելել է, որ համաձայնեցվել են Ուկրաինային տրամադրվող հետագա համապարփակ աջակցության միջոցառումները, այդ թվում՝ օգնությունը հակաօդային պաշտպանության, հեռահար զենքի, անօդաչու թռչող սարքերի և հրետանային զինամթերքի ոլորտներում: Բացի այդ, կկազմակերպվի թվային մարտական տվյալների փոխանակում՝ նոր զենքի համակարգերի մշակման համար։
«Այն, ինչ մենք անում ենք այս համագործակցության միջոցով, օգտակար է ոչ միայն Ուկրաինայի պաշտպանության համար։ Այն նաև հատկապես օգտակար է մեզ համար, մեր անվտանգության համար»,- ընդգծել է Մերցը։
Նա հավելել է, որ «վերջին տասնամյակներում Եվրոպայում ոչ մի բանակ այնքան մարտական փորձություն չի անցել, որքան ուկրաինականը»։
«Ոչ մի հասարակություն ավելի դիմացկուն չի դարձել, քան ուկրաինականը։ Ոչ մի պաշտպանական արդյունաբերություն ավելի նորարար չի դարձել, քան ուկրաինականը»,- ասել է կանցլերը։
Միաժամանակ, Գերմանիայի կառավարության ղեկավարը կրկին աջակցել է Կիևի՝ ԵՄ-ին միանալու նպատակին: Չնայած այս նպատակը կարճաժամկետ հեռանկարում հասանելի է, նա ընդգծել է, որ Ուկրաինայի ԵՄ-ին միանալը կլինի ռազմավարական կարևոր քայլ Եվրոպայի համար։ Ավելին, կանցլերը հույս է հայտնել, որ Հունգարիայում կառավարության փոփոխությունը կհանգեցնի Ուկրաինային տրամադրվող եվրոպական օգնության արագ ապաբլոկավորմանը: Նա նաև հայտարարել է Ռուսաստանի «ստվերային նավատորմի» դեմ հետագա քայլերի մասին։
Գերմանիայի պաշտպանության նախարար Բորիս Պիստորիուսը և նրա ուկրաինացի գործընկեր Միխայիլ Ֆյոդորովը ստորագրել են պաշտպանական համագործակցության համաձայնագիր։ Գերմանիայի տնտեսական համագործակցության և զարգացման նախարար Ռիմ Ալաբալի-Ռադովանը և Ուկրաինայի էկոնոմիկայի, շրջակա միջավայրի և գյուղատնտեսության նախարար Ալեքսեյ Սոբոլևը ստորագրել են Ուկրաինայի վերականգնմանը և արդյունաբերական դիմակայունությանը աջակցելու մտադրության հռչակագիր:
Վլադիմիր Զելենսկին, իր հերթին, մերժել է ՆԱՏՕ-ին ու Եվրամիությանը Ուկրաինայի մասնակի անդամակցության տարբերակները: Ուկրաինային ո՛չ «թեթև ԵՄ» է պետք, ո՛չ էլ «թեթև ՆԱՏՕ», քանի որ նման կառույցները ոչ մեկին օգուտ չեն բերի, հայտարարել է նա։
Ավելի վաղ Մերցը Բեռլինում Զելենսկիին ընդունել էր ռազմական պատիվներով: Երկու առաջնորդները նաև զննել են գերմանա-ուկրաինական համատեղ նախագծերի շրջանակում մշակվող տարբեր անօդաչու համակարգեր։
Գերմանիայի մայրաքաղաքում բանակցությունների կենտրոնական թեման Ուկրաինային շարունակական օգնությունն է, որն արդեն հինգ տարի է, ինչ պաշտպանվում է ռուսական լայնածավալ ներխուժումից:
Թարգմանությունը՝ Էմմա Չոբանյանի