Ինչպես ժամանակին տեղեկացրել ենք՝ 2025 թ. դեկտեմբերի 2-ին ԿԳՄՍ նախարար Ժաննա Անդրեասյանը թիվ 219–Ա/1 հրամանով Կարեն Լազարյանին ազատել է «Գորիսի պետական քոլեջ» ՊՈԱԿ–ի տնօրենի պարտականություններից, որից հետո քոլեջի շենքը բռնազավթվել է ոստիկանական հագուստով մի խումբ անձանց կողմից՝ ուղեկցվելով դասախոսներին ուղղված սպառնալիքներով ու խուլիգանական գործողություններով։
Սակայն նախարարի պաշտոնը զբաղեցնող տիկնոջ վերոնշյալ հրամանում մատնանշված չի եղել որևէ փաստական կամ իրավական հիմք, ասել է թե՝ չի նշվել Կարեն Լազարյանին աշխատանքից ազատելու գոնե մեկ պատճառ։
Իրավական և փաստական հիմքերից զուրկ հրամանը Գորիսում ընկալվել է իբրև պատվերի կատարում նախարարի կողմից՝ ընդդեմ Կարեն Լազարյանի, կամ քոլեջի տնօրենի պաշտոնը աճուրդի հանելու գործընթացի հերթական փուլ։
Ինչևէ, Կարեն Լազարյանը դատական կարգով վիճարկել է ԿԳՄՍ նախարարի կեղծապատիր ու կամայական հրամանը։
Ս.թ. մարտի 30-ին Երևան քաղաքի առաջին ատյանի ընդհանուր իրավասության քաղաքացիական դատարանը կայացրել է վճիռ ներկայացված հայցի վերաբերյալ, որը հասանելի է դարձել այսօր՝ ապրիլի 14-ին։
Ընդունված վճռով դատարանն անվավեր է ճանաչել ՀՀ ԿԳՄՍ նախարար Ժ. Անդրեասյանի 02.12.2025 թ. թիվ 219-Ա/1 հրամանը։
Դատարանը միաժամանակ պարտավորեցրել է ԿԳՄՍ նախարարությանը՝ Կարեն Լազարյանին վճարել դրամական հատուցում՝ միջին ամսական աշխատավարձի եռապատիկի չափով, ինչպես և գումար՝ հարկադիր պարապուրդի ողջ ժամանակահատվածի համար՝ մինչև եզրափակիչ դատական ակտի ուժի մեջ մտնելը։
Դատարանը նաև արձանագրել է փաստը, որ ՀՀ ԱՆ իրավաբանական անձանց պետական ռեգիստրի միասնական գրանցամատյանի տեղեկանքի համաձայն՝ ՀՀ ԿԳՄՍ նախարարության «Գորիսի պետական քոլեջ» ՊՈԱԿ–ի գործունեությունն այլևս դադարեցված է։
Կդիմի՞ Ժաննան վերաքննիչ բողոքի, թե՞ ոչ։ Դա, անշուշտ, իր գործն է…
Խնդիրը, մինչդեռ, այդ ամենով չի կարող ավարտված համարվել։
Ժաննա Անդրեասյանը (արդեն իսկ մեկնարկած քրեական վարույթի շրջանակում) պետք է պատասխան տա՝ անձնական ի՞նչ շահի մղումով է շրջանցել գործող օրենսդրությունը և ապօրինի հրաման արձակել, անձնական ի՞նչ շահի մղումով է կեղծված հավաստագրով կնոջը նշանակել «Գորիսի պետական քոլեջ» նախկին ՊՈԱԿ–ի, ապա և Գորիսի երկու քոլեջի միաձուլմամբ ստեղծված նոր քոլեջի տնօրենի պաշտոնակատար։